Sùil eile air Tòrr na Grèine?

Image copyright Other

Image caption Bhiodh am baile ùr nas motha na tha baile Inbhir Narrann.

Feuchaidh comhairliche ri taic fhaighinn son toirt air Comhairle na Gàidhealtachd coimhead a-rithist ri planaichean connpsaideach baile ùr a thogail aig Tòrr na Grèine faisg air Port-Adhair Inbhir Nis.

Fhuair am pròiseact, le 4,560 taigh, cead dealbhachaidh gun bhòt a bhith air a cumail aig coinneamh na bu thràithe air an t-seachdain.

Thuirt oifigearan nach b' urrainn do chomhairlichean cur na aghaidh leis gun robh e ann am Plana Leasachaidh Ionadail na Gàidhealtachd (HwLDP).

Tha Ruairidh Balfour air a bhith a' cumail choinneamhan le comhairlichean faic an gabh toirt air an ùghdarras meòrachadh air a' chùis uair eile.