Euslaintich a' fulang ri linn droch tharraing fòn-làimhe

Fear air fòn
Image caption Tha gainnead tarraing na dhuilgheadas dha na seirbheisean meidigeach is eile.

Tha euslaintich ann an sgìrean dùthchail ann an Alba a' call chothrom air buannachd fhaighinn à teicneòlas mheidigeach ri linn droch tharraing fòn-làimhe.

Tha aithisg ùr bho Sheirbheis an Teasairginn Èiginnich Mheidigich, a bhios a' toirt seachad cùraim shònraichte ann an sgìrean dùthchail, a' mìneachadh mar a tha seo a' toirt buaidh air euslaintich agus luchd-obrach slàinte.

"Chan eil teagamh gu bheil e na dhuilgheadas nuair a tha sinn a' feuchainn ri gnothaichean a chur air dòigh airson iomairt teasairginn," thuirt an Mgr Anndra Inglis, a tha na fhear-comhairleachaidh san t-seirbheis.

"Tha còig de na h-ospadalan coimhearsnachd far nach eil tarraing fòn-làimhe earbsach.

"'S e slàinte, gu dearbha, dìreach fear de na h-adhbharan gu bheil seo na thrioblaid - foghlam, gnothachas, turasachd.

"Bhiodh iad sin uile nan adhbharan gu math feumail airson teicneòlas fòn-làimhe a bhith ri fhaighinn sna sgìrean seo.

"'S e gnothach gu math doirbh a th' ann freagairt fhaighinn bho na companaidhean fòn-làimhe.

"Tha cuid dhiubh air a bhith tòrr na b'fheàrr na cuid eile, 's feadhainn gu math cuideachail.

"Ach gu bunaiteach, tha mi a' smaointinn gur e iomairt leantainneach a bhios ann bho iomadh buidheann agus taobh airson atharrachadh fhaighinn," thuirt e.