Iarrtas son ath sgrùdadh air baile ùr faisg air Inbhir Nis

Clàr na sgìre
Image caption Tha planaichean ann son faisg air 5000 taigh a thogail.

Thèid iarraidh air comhairlichean Gàidhealach an t-seachdain-sa, beachdachadh a-rithist air plana gus baile ùr a thogail.

Tha planaichean anns son na mìltean de thaighean a thogail ri taobh an A96 eadar Inbhir Nis agus Inbhir Narann.

Tha ochdnar chomhairlichean ag ràdh gum bu chòir ath-sgrùdadh a dhèanamh air co-dhùnadh chomataidh dealbhachaidh na Comhairle.

Thug iadsan cead seachad san Lùnasdal airson cha mhòr 5000 taigh ùr a thogail aig Tòr na Grèine.

Ath-sgrùdadh

Tha a' bhuidheann Moray Estates am beachd 4960 taigh, goireasan coimhearsnachd, bùthan agus ionadan gnìomhachais a thogail aig Tòr na Grèine.

Thug comataidh dealbhachaidh na Comhairle cead dhan na planaichean anns an Lùnasdal, le naoinear bhall a' dol an aghaidh a' cho-dhùnaidh sin.

A-nis tha cuid dhen na comhairlichean sin - seachdnar buill neo-eisimileach agus Donaidh Kerr bho Phàrtaidh Nàiseanta na h-Alba - ag iarraidh ath-sgrùdadh air a' cho-dhùnadh sin.

Tha am Pàrtaidh Uaine ag ràdh nach robh leasachadh de a leithid ann am manifesto taghaidh gin dhen na pàrtaidhean.

Tadhalaidh buill na comataidh dealbhachaidh air an làraich a-rithist mus tig iad gu co-dhùnadh.