Mòd Dhùn Omhainn

B' ann ann an 2006 a bha am Mòd Nàiseanta Rìoghail ann an Dùn Omhainn mu dheireadh

Tha obair mhòr a' dol ann an Dùn Omhainn, 's am Mòd Nàiseanta Rìoghail a' tighinn chun a' bhaile air an ath-mhìos.

'S e seo an seachdamh turas a thèid am Mòd a chumail anns a' bhaile.

Bidh am Mòd a' ruith bhon 12mh là chun 20mh là dhen Damhair, agus tarraingidh e na mìltean dhaoine a dh'Earra-Ghàidheal.

Bidh cha-mhòr 1,650 duine cloinne bho air feadh na dùthcha a' gabhail pàirt ann am farpaisean na cloinne am bliadhna - mun aon àireamh 's a bh' ann nuair a chaidh am Mòd a chumail anns a' bhaile mu dheireadh ann an 2006.

Tha an àireamh fhireannach a chuir a-steach airson nam prìomh fharpaisean nas àirde am bliadhna.

Ullachadh mòr

Thuirt Cairistiona Stark, a tha na ball dhen chomataidh ionadail, gu bheil iad air trì bliadhna a chur seachad a' cruinneachadh airgid airson a' Mhòid, agus a' cur air dòigh nan goireasan a tha a dhìth.

"Tha sinn a' dèanamh fiughair air muinntir na Gàidhealtachd a' tighinn thugainn agus tha sinn an dòchas gun còrd am Mòd riutha nuair a thig iad," thuirt i.

Tha i a' dèanamh dheth cuideachd gur e àite gu math goireasach a th' ann an Dùn Omhainn airson an tachartais leis gur e baile beag a th' ann 's nach bi aig daoine ri cus siubhail a dhèanamh.

'S e deagh thìde uireas a tha a dhìth a-nis, thuirt i, airson dèanamh cinnteach gum bi Mòd soirbheachail aca.