Lùghdachadh air luchd-siubhail adhair
- Air fhoillseachadh
Thàinig lùghdachadh de cha-mhòr 35% air an àireamh luchd-siubhail a chaidh tro Phort-adhair Inbhir Ùige san Lùnastal.
Sheall figearan bho chompanaidh nam port-adhair HIAL gun robh an àireamh dhaoine a chleachd puirt-adhair Thiriodh, Bheinn nam Fadhla agus Steòrnabhaigh cuideachd sìos air a' mhìos roimhe.
Tha HIAL a' dèanamh dheth gur e mar a chaidh crìoch a chur air pròiseact nan sgoiltean ùra ann an Leòdhas, 's cuid dhen luchd-obrach air a bhith a' sgeith air ais 's air adhart à Tìr Mòr, a dh'fhàg gun tàinig ìsleachadh de cha-mhòr 2.5% air figearan Phort-adhair Steòrnabhaigh.
Àrdachadh
Air an làimh eile, 's ann a thàinig àrdachadh air an àireamh dhaoine a chaidh tro phuirt-adhair Bharraigh agus Ìle.
Bha àireamhan Ìle an-àirde 10.5%, agus chunnaic Phort-adhair Bharraigh àrdachadh de 9.2%.
Dh'èirich cuideachd an àireamh dhaoine a chleachd Port-adhair Inbhir Nis 5%, 's HIAL ag ràdh gur e an t-seirbheis ùr aca a dh'Amsterdam a chuidich na figearan sin.