Sgeama ghèadh a' soirbheachadh ann an Uibhist

Air fhoillseachadh
Tùs an deilbh, Getty Images
Fo-thiotal an deilbh, Fhuair croitearan toradh arbhair math am bliadhna sa chumantas.

Thathas den bheachd gun do shoirbhich le sgeama fuadachaidh nan geadh ann an Uibhist am bliadhna.

Tha sin a dh'aindeoin 's gun robh àireamh nan geadh san sgìre nas àirde na bha i riamh.

Chaidh faisg air 10,000 gèadh a chlàradh ann an Uibhist san t-Sultain.

Ach a rèir rannsachaidh a chaidh a dhèanamh le Machair Life, a tha a' ruith an sgeama fhuadachaidh, 's e glè bheag de dh'arbhar a chaidh a mhilleadh leotha.

800 Geadh air am Marbhadh

Tha croitearan ag ràdh, agus am bàrr a-nis air a chruinneachadh 's cuid mhath dheth air a bhualadh, gu bheil deagh fhoghair air a bhith aca, 's cuid mhath sìl aca.

A dh'aindeoin sin, tha gu leòr de chroitearan san sgìre a chaill arbhar do na geòidh.

Tha an sgeama fuadachaidh ag amas air arbhar nan croitearan a-mhàin a dhìon, agus tha Machair Life den bheachd, seach gun robh bàrr an ìre mhath math ann am bliadhna, gun do shoirbhich leis an sgeama.

A rèir fhiosrachaidh bho Machair Life agus Dualchas Nàdair na h-Alba, a tha le chèile an sàs ann a bhith a' cunntadh na tha de gheòidh ann an Uibhist, chaidh 8,650 gèadh a chunntadh o chionn ghoirid.

Tha na buidhnean cuideachd ag ràdh gu bheil fhios le cinnt aca gun deach co-dhiù 800 gèadh a mharbhadh bhon Lùnastal.

Tha an dà àireamh sin a' sealltainn gun robh mu 10,000 gèadh ann an Uibhist aig aon àm na bu tràithe air a' bhliadhna.

Luchd-obrach

Tha Machair Life ge-tà, ag ràdh nach bi na h-uidhir den uidheamachd a thug iad seachad do chroitearan airson ruaig a chur air na geòidh aca an ath-bhliadhna ri linn atharrachaidh sa bhuidseat aca.

Tha iad a' cur ìmpidh air croitearan an uidheamachd a fhuair iad am bliadhna a chumail ann an deagh òrdugh airson a chleachdadh an ath-bhliadhna cuideachd.

Bidh a' bhuidheann cuideachd a' fastadh cuid de dhaoine anns na bailtean airson a bhith a' fuadachadh nan geadh.

Thuige seo, tha na daoine a bh' air am fastadh airson sin air a bhith ag obair uairean neo-stèidhichte.

An ath-bhliadhna ge-tà, tha a' bhuidheann ag ràdh gum bi uairean stèidhichte aig an luchd-obrach, gus am bi fios aig na croitearan cuin a bhios iad ann, agus cuin a bhios uallach orra fhèin airson coimhead às dèidh an cuid arbhair.

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh