Stiùidio
Cha chluich seo air an uidheamachd agaibh

Naidheachdan 11:00m.

24 An Dàmhair 2012 Ùraichte aig Ùraichte aig

Alba san Aonadh Eòrpach

Tha na pàrtaidhean eile ag iarraidh air Riaghaltas SNP na h-Alba comhairle laghail sam bith a fhuair iad mu bhallrachd Alba neo-eisimeilich anns an Aonach Eòrpach fhoillseachadh. Chaidh am Prìomh Mhinistear, Ailig Salmond, às àicheadh an-dè gun do dh'innis e breugan mun chùis nuair a bhruidhinn e ris a' BhBC air a' chùis anns a' Mhàrt. Thuirt an Leas-Phrìomh Mhinistear, Nicola Sturgeon, gun gabhadh duine reusanta sam bith ri mìneachadh Mhgr Salmond, ach chan eil na pàrtaidhean dùbhlain riaraichte le sin.

Neo-eisimeileachd a' BhBC

Thug Cathraiche Urras a' BhBC, am Morair Patten, rabhadh do mhinistear riaghaltais gun teagamh a chur ann an neo-eisimeileachd a' BhBC, an lùib an sgainneil mu Jimmy Savile. Thuirt Rùnaire a' Chultair, Maria Miller, gu bheil dragh oirrese mu earbsa an t-sluaigh sa BhBC an dèidh na th' air tighinn am follais mun cho-dhùnadh rannsachadh Newsnight air Savile a leigeil às. Bha seo an dèidh do dh'Àrd-stiùiriche a' BhBC, George Entwhistle, a dhol fo cheasnachadh aig Comataidh a' Chultair an-dè.

Drabastair

Thuirt Scotland Yard gun deach cleasaiche telebhisein a chur fo chasaid gun do dh'èignich e gille 14 bliadhna de dh'aois. Tha an t-actar, nach fhaodar ainmeachadh air adhbharan laghail, fo chasaid gun tug e ionnsaigh air a' ghille aig taigh-chluiche ann an Lunnainn.

Co-ionnanachd Phàighidh

Tha riaghladh bhon Phrìomh Chùirt an-diugh a' toirt cothrom do na mìltean bhoireannach a dhol gu lagh airson pàigheadh co-ionnan ri fir. Thàinig breith bhon Phrìomh Chùirt a leigeas leotha a dhol dhan Chùirt seach gu tribunal. 'S tha sin a' ciallachadh gu bheil cothrom ann cùis a thogail cho fada ri sia bliadhna an dèidh làimhe, seach sia mìosan.

Heileacoptair

Tha e air tighinn am follais gur e dragh a bh' air na pìleatan mun ghèarbocsa is coireach gun tàinig air heileacoptair Superpuma laighe sa mhuir ann an èiginn faisg air Sealtainn a' bhòn-dè. Thuirt Eurocopter, a tha a' togail an heileacoptair Superpuma, gun deach rabhadh gum faodadh trioblaid a bhith ann le siostam ola a' ghèarbocsa. Thàinig 19 duine a bh' air bòrd às gu sàbhailte.

Tubaistean Mairbhteach

Bha lùghdachadh de 11% san àireamh de bhàs air rathaidean na h-Alba ann an 2011. Chaill 168 am beatha ann an tubaistean-rathaid an-uiridh. Tha sin sìos bho 208 ann an 2010. Bha an àireamh a chaidh a leòn sìos cuideachd dhan ìre as ìsle bho thòisich clàradh bho chionn còrr is 60 bliadhna.

Scalpaigh

Chuala coinneamh ann an Scalpaigh an-raoir gu bheil deagh chothrom aig an eilean air soirbheachas fo smachd na coimhearsnachd. Bha a' choinneamh a' beachdachadh air na thàinig à co-chomhairleachadh air plana an uachdarain an t-eilean a thoirt do mhuinntir an àite. Tha dùil gun tèid pàipearan baileat a sgaoileadh tron phost a-màireach airson cothrom a thoirt do dhaoine bhòtadh air a' chùis.