Stiùidio
Cha chluich seo air an uidheamachd agaibh

Naidheachdan 11:00m.

25 An Dàmhair 2012 Ùraichte aig Ùraichte aig

An Eaconamaidh

Thàinig crìoch oifigeil air seacadh eaconamach Bhreatainn, agus àireamhan ùra a' sealltainn gun do dh'fhàs an eaconamaidh anns an treas cairteal den bhliadhna. Bha an t-àrdachadh ann an GDP na Rìoghachd Aonaichte cuideachd nas motha na bha dùil, aig 1%. Sin an t-àrdachadh ràitheil as motha ann an còig bliadhna, a rèir Oifis na Staitistig Nàiseanta. Bha eòlaichean den bheachd gum biodh e nas fhaisge air 0.6%.

Comhairle Laghail

Dh'aidich Leas-Phrìomh Mhinistear na h-Alba, Nicola Sturgeon, gu bheil e mì-fhortannach gun deach leigeil le daoine a bhith a' smaointinn gun robh comhairle laghail aig ministearan an SNP air an àite a bhiodh aig Alba neo-eisimeilich san Aonadh Eòrpach, nuair nach robh. Tha dùil gun tèid tuilleadh cuideim a chur air Ailig Salmond mun chùis nuair a nochdas e aig àm Cheistean a' Phrìomh Mhinisteir feasgar.

Cyanide

Tha fear fhathast fo chùram san ospadal ann an Steòrnabhagh air eagal 's gun deach a thruailleadh leis a' phuinnsean cyanide. Chaidh an duine ainmeachadh gu h-ionadail mar Dickon Green leis a bheil loidse iasgaich aig Tiomsgarraidh ann an Ùig'. Fhuair triùir eile cùram cuideachd - fear a thug taic dha, agus dithis de chriutha charbaid-eiridinn, ach cha deach an cumail anns an ospadal.

Heileacoptairean Superpuma

Thàinig e am follais gu bheil BP air stad a chur air dà heileacoptair teasairginn Superpuma a th' aca anns a' Chuan a Tuath a bhith a' sgiathadh ach a-mhàin nuair a tha beatha ann an cunnart. Tha seo a' leantainn air mar a thàinig itealan Superpuma, a tha coltach ris an fheadhainn aig BP, a-nuas dhan mhuir faisg air Sealtainn Diluain. Thuirt a' chompanaidh ola gu bheil iad a' sealltainn ri heileacoptairean Sikorsky a chleachdadh fhad 's a tha sgrùdadh ga dhèanamh air dè dh'adhbharaich an tubaist.

Rannsachadh Muirt

Chaidh rannsachadh muirt a chur air chois ann an Siorrachd Lannraig a Deas às dèidh mar a fhuaireas corp boireannaich ann an taigh ann an Cille Brìghde an Ear. Thadhail Poilis air taigh air Old Coach Road, mu 10:45f an-raoir, às dèidh dhaibh aithrisean fhaighinn gun deach boireannach a ghoirteachadh. Thuirt Poilis gu bheil iad den bheachd gun deach ionnsaigh a thoirt air a' bhoireannach, a bha 51, a dh'aona-ghnothaich.

Èigneachadh

Agus tha Poilis Lodainn 's nan Crìochan a' sireadh fianaisichean às dèidh mar a chaidh deugaire èigneachadh ann an Dal Chèith tràth madainn na Sàbaid. Chaidh ionnsaigh a thoirt air an nighean, a tha 18, ann an coille bhig, faisg air geataichean Bun-sgoil Naomh Dhàibhidh. Tha na Poilis airson bruidhinn ri neach sam bith a bha mu thimcheall air Rathad Lauder, agus Slighe Kippilaw anns a' bhaile eadar meadhan oidhche agus 02:00m.