Rannsachadh RET a' tighinn gu ceann

Air fhoillseachadh
Fo-thiotal an deilbh, Tha Comhairle nan Eilean Siar a' rannsachadh buaidh an àrdachaidh ann am faraidhean bathair air eaconamaidh nan Eilean.

Thig rannsachadh air-loidhne mu atharrachadh ris an sgeama RET do luchd-bathair gu ceann Dihaoine.

Nochd dragh mòr nuair a chaidh fhoillseachadh gun atharraicheadh an sgeama as t-Earrach am bliadhna - a' fàgail gun tigeadh àrdachadh 50% air faraidhean do charbadan coimearsalta.

Tha àrdachadh eile de 50% san amharc sa Ghiblean an ath-bhliadhna.

Chuir Riaghaltas na h-Alba rannsachadh air dòigh gus dearbhadh dè a' bhuaidh a thug an t-àrdachadh air luchd-gnothaich agus air eaconomaidh nan Eilean.

Buaidh Fharsaing

Thuirt Stiùiriche Leasachaidh Eaconamaich Comhairle nan Eilean Siar, Joe Mac a' Phì, gu bheil an t-àrdachadh a' toirt buaidh air muinntir nan Eilean air fad.

"Tha buaidh aige air a h-uile dachaigh 's air a h-uile teaghlach - chan e a-mhàin air gnìomhachas," thuirt e.

Tha a' Chomhairle ag iarraidh air na 's urrainn de luchd-gnothaich anns na h-Eileanan, pàirt a ghabhail ann an sgrùdadh an Riaghaltais.

Tha Mgr Mac a' Phì ag ràdh gum feum fianais chruaidh a bhith aca mu bhuaidh an àrdachaidh.

"Mar as motha de dhaoine a chuireas a-staigh beachd, 's ann nas cudromaiche a bhios am fiosrachadh agus 's ann as fheàrr a bhios e," thuirt e.

Tuilleadh air an sgeulachd seo