BSGI a-nise gun cheannard

Thèid obair a' cheannaird aig BSGI a shanasachd a-rithist, is an sgoil a-nise gun cheannard idir.

Tha am buaireadh mu cheannas Bun-sgoil Ghàidhlig Inbhir Nis a' leantainn agus an sgoil a-nise air an ceannard eadar-amail aice a chall.

Dh'innis Comhairle na Gàidhealtachd do phàrantan gun robh Annika Jansson a' fàgail às dèidh mar nach deach a cur san dreuchd air cùmhnant maireannach.

'S i an aon thagraiche a bh' ann.

Ged a bha i na ceanard eadar-amail airson còrr is dà bhliadhna, bha cuid de phàrantan agus Comann nam Pàrant Inbhir Nis gu làidir an aghaidh ceannard gun Ghàidhlig a chur san obair làn-ùine.

Dhearbh a' Chomhairle Dimàirt gun robh a Bh.Ph. Jansson a' fàgail na sgoile agus gun tèid i gu sgoil air choireigin eile ann an sgìre Inbhir Nis.

Thuirt iad gun tèid an obair a shanasachd a-rithist agus gu bheil còmhraidhean a' leantainn mun dòigh as fheàrr an sgoil a stiùireadh san eadar-ama.

Tàmailteach

Tha an suidheachadh air cuid de phàrantan fhàgail tàmailteach.

"Bu chòir dhaibh an obair a thoirt air ais dhi," thuirt tè de na pàrantan, Sarah NicIain.

"Nach eil e nas fheàrr ceannard a bhith ann aig a bheil eòlas air an sgoil agus a' chlann aice fhèin san sgoil?

"Nach eil e nas fheàrr cuideigin a bhith ann seach an obair a bhith bàn?

"Tha mi a' smaoineachadh gun tig pàrantan eile air adhart oir tha coltas ann nach eil ann ach aona bhuidhinn bheag a tha a' creidsinn gun robh seo a' toirt buaidh air an sgoil.

"Chanainn-sa gu bheil a' mhòr-chuid de phàrantan ag aontachadh gun robh còir aig a' Chomhairle a bhith air an obair a thoirt do dh'Annika Jansson, 'son faicinn ciamar a gheibheadh i air adhart," thuirt i.