Tuath-gaoithe Tholastaidh na "bhuannachd"

Chruthaicheadh an tuath-gaoithe 42 Megawatt de dhealan sa bhliadhna.

Tha croitearan Tholastaidh ann an Leòdhas ag ràdh gum bi tuath-gaoithe a tha 2020 Renewables am beachd a thogail san sgìre na bhuannachd dhaibhsan agus dhan bhaile.

Bhiodh 14 crainn-ghaoithe anns an sgeama, le dùil gun cuireadh e mu £300,000 gach bliadhna dhan choimhearsnachd.

Chruthaicheadh an tuath-gaoithe 42 megawatt - 3 mw airson gach crainn-ghaoithe.

Chum a' chompanaidh taisbeanadh mu na planaichean a tha san amharc aca ann an Talla Tholastaidh bho Thuath Dimàirt.

A h-uile oidhirp

Tha ceistean mu choinneamh a' phròiseict ge-tà, agus dàil eile air tighinn air Càbal a' Chuain Sgìth, a bheireadh dealan bho sgeamaichean ath-nuadhachail sna h-Eileanan Siar, gu Tìr Mòr airson a cheangal ris a' Ghriod Nàiseanta.

"Mar as trice bidh thu a' cluinntinn dhaoine a' gearain nach eil fhios aca dè mar a tha cùisean a' dol nuair a tha thu a' faicinn ghnìomhachasan mar seo a' dol air adhart," thuirt comhairliche na sgìre, Iain A. MacÌomhair.

"Ach tha iad seo air a bhith a' bruidhinn ris na daoine bho thoiseach-tòiseachaidh.

"'S e seo an dàrna turas a tha iad air a bhith a' dèanamh taisbeanaidh mar seo dhan choimhearsnachd.

"An rud a tha mi a' faicinn an seo an-diugh, tha mi gu math toilichte leis.

"Gu h-àraid a' bhuannachd a tha gu bhith ann dhan choimhearsnachd ma thèid seo air adhart.

"Tha iad a' bruidhinn air £7,500 gach megawatt. Nise tha sin gu bhith mìorbhailleach dhan choimhearsnachd ma thig e.

"Tha an là air falbh far a bheil "handouts" gu bhith a' tighinn dha na coimhearsnachdan tuilleadh. Feumaidh sinn a bhith a' dèanamh a h-uile oidhirp airgead a thional dhuinn fhèin.

"'S e dòigh mhath a tha seo airson airgead fhaighinn airson feum a dhèanamh anns na coimhearsnachdan," thuirt e.