Dragh mu bhradan GM

'S e seo a' chiad turas a cheadaicheadh beathach GM, seach lus, a bhith air àrach airson bìdh.

Tha Ball-Pàrlamaid Albannach ag iarraidh gun tig iasgairean-slaite agus tuathanaich èisg còmhla, airson cur an aghaidh mar a tha na Stàitean Aonaichte air cead a thoirt do bhradain GM a bhith gan àrach.

Tha Rob Gibson, a tha a' riochdachadh Ghallaibh, Chataibh agus Rois dhan SNP, draghail gun toir iad na gineachan mì-nadarra aca seachad do bhradain fhiadhaich sa Chuan Siar ma gheibh iad ma-sgaoil.

'S e sin am bradan a gheibhear ann an aibhnichean na h-Alba.

'S iad buidheann tèarainnteachd a' bhìdh sna Stàitean Aonaichte, an FDA, a thug cead seachad airson bhradain GM a bhith air an àrach, 's iad ag ràdh nach eil cunnart an lùib a bhith a' dèanamh seo, fhad 's gun àraichear iad ann an àrainneachd a tha gu tur fo smachd.

Tha Mgr Gibson gu math draghail mu dheidhinn sin ge-tà, agus e ag iarraidh air iasgairean-slaite agus tuathanaich èisg tighinn còmhla gus cur an aghaidh a' cho-dhùnaidh.

'S e seo a' chiad turas riamh a chaidh beathach sam bith a th' air atharrachadh tro GM, a cheadachadh airson biadh mhic an duine.

Bidh Mgr Gibson a' sgrìobhadh gu Rùnaire na h-Àrainneachd feuch dè an dòigh as èifeachdaiche air an cuirear an aghaidh a' cho-dhùnaidh a rinneadh anns na Stàitean Aonaichte.