"Briseadh dùil mòr" dha na h-Eileanan Siar

Cha d'fhuair a' chompanaidh cead-dealbhachaidh airson dà thuathanas-èisg a bha san amharc aca.

Tha an naidheachd gu bheil obraichean gu bhith air an gearradh aig factaraidhean giollachd bhradan ann an Leòdhas, na briseadh dùil mòr do dh'eaconamaidh nan Eilean Siar, a rèir Fhir-Ghairm na Comhairle.

Bha Tormod Dòmhnallach a' bruidhinn às dèidh don Scottish Salmon Company innse gum feum iad na h-uidhir de chosnaidhean a ghearradh aig na factaraidhean aca ann am Marybank agus ann an Àranais.

Am measg na tha ri choireachadh, tha galar a sgap tro chuid de stoc èisg na companaidh, agus gu bheil prìs a' bhradain air a bhith ìosail.

Tha cuid a' coireachadh nach d'fhuair a' chompanaidh cead-dealbhachaidh airson dà thuathanas-èisg ùr a bha iad airson stèidheachadh, fear ann am Plòcrapol anns na Hearadh, agus fear eile faisg air Tolastadh ann an Leòdhas.

"'S e briseadh dùil dha-rìribh a th' ann gu bheil iad a' gearradh sìos air an àireamh de dhaoine a tha gu bhith ag obair san fhactaraidh aca ann an Steòrnabhagh agus tha sinn an dòchas gun gabh sin a chur ceart cho luath 's a ghabhas," thuirt Mgr Dòmhnallach.

"Tha sinn air a bhith a' còmhradh ris a' chompanaidh bho thòisich iad, agus tha sinn air a bhith gu math taiceil dhan phlana leasachaidh a th' aca airson an gnìomhachas a thoirt air adhart.

"Leanaidh na còmhraidhean sin air adhart, ach tha sinn a' tuigsinn gu bheil duilgheadasan sònraichte air a bhith aca air a' bhliadhna a chaidh seachad coltach ri companaidhean eie a tha an sàs ann an àrach bhradan. Tha iad fhèin a' meas gum bi sin air a chur ceart mu dheireadh na bliadhna seo.

"Tha iad fhèin air a ràdh nach d'fhuair iad air adhart leis na leasachaidhean sin mar a bha dùil aca sa chiad àite.

"Ach tha tòrr obrach ri chur an sàs ann a bhith a' toirt air adhart iarrtas cead-dealbhachaidh airson tuathanas-èisg.

"Feumaidh sinne mar chomhairle cothromachadh a dhèanamh air leasachadh a thoirt air adhart, agus cuideachd a' bhuaidh aige sin air an àrainneachd.

"'S e sin as coireach, gu ìre, gun deach cead a dhiùltadh airson tuath Tholastaidh, agus 's iad fhèin a tharraing air ais iarrtas airson leudachadh a dhèanamh air an làraich aca ann am Plòcrapol anns na Hearadh," thuirt e.