Comhairlean ag aontachadh am buidseatan
- Air fhoillseachadh
Beachdaichidh Comhairle nan Eilean Siar air a' bhuidseat aca Diardaoin 's iad gu bhith a' feuchainn ri airgead a shàbhaladh thairis air an dà bhliadhna a tha romhainn.
Am measg rudan eile, bidh iad a' coimhead air tideseran sònraichte a bhios a' tadhail air bun-sgoiltean, agus seirbheisean adhair eadar Barraigh is Beinn nam Fadhla.
Ann an Earra-Ghàidheal tha eagal ann gum faodadh faisg air 700 dreuchd a bhith ann an cunnart aig a' Chomhairle thairis air an ath sheachd bliadhna, 's buill na sgìre cuideachd gu bhith a' beachdachadh air a' bhuidseat Diardaoin.
Feumaidh iad £5.8m a shàbhaladh anns a' bhliadhna a tha romhainn.
Am measg nan rudan air am faodadh na gearraidhean bualadh, tha a' Ghàidhlig, le moladh £100,000 a ghearradh bho na bheireas an t-ùghdarras iondail de mhaoineachadh don chànan.
Tidsearan-taice is Leabharlannan
Ann am Moireibh tha comhairlichean air gabhail ri gearraidhean luach £7m anns a' bhuidseat aca airson na bliadhna a tha romhainn.
Ghabh buidheann-riaghlaidh na Comhairle ri atharrachadh aig a' mhionaid mu dheireadh a dh'fhàgas nach caill uidhir de luchd-taic thidsearan an cuid dhreuchdan.
Fon atharrachadh, caillidh 20 tidsear-taice an dreuchdan, seach an 40 ris an robh dùil an toiseach.
Tha ceannard na Comhairle, Ailean Wright, air rabhadh a thoirt ge-tà, gum faicear sgoiltean a' dùnadh fhathast.
Bha luchd-iomairt air cruinneachadh taobh a-muigh prìomh oifisean na Comhairle ann an Eilginn a' cur an aghaidh phlanaichean gus gearradh a thoirt air na bh' ann de thidsearan-taice san sgìre.
Chaidh am buidseat troimhe, 13 - 9, le triùir chomhairlichean a' diùltadh bhòtadh idir.
Dùinidh seachd leabharlannan air feadh na sgìre, agus caillidh buidhnean ealain am maoineachadh gu lèir a bha iad a' faighinn bhon Chomhairle.
Tha subsadaidhean airson seirbheisean bhusaichean cuideachd gan gearradh.
Thuirt Mgr Wright, gum bi gearraidhean tòrr nas motha a dhìth thar an ath thrì bliadhna, airson £30m a ghearradh far a' bhuidseit aca.