Bochdainn connaidh fon phrosbaig

Tha timcheall air 60% de thaighean anns na h-Eileanan an Iar ann am bochdainn connaidh.

Thèid beachdachadh air bochdainn connaidh anns na h-Eileanan an Iar aig co-labhairt ann an Steòrnabhagh an t-seachdain seo.

A rèir Riaghaltas na h-Alba, tha taigh ann an bochdainn connaidh ma 's e is gu bheil na daoine a tha a' fuireach ann a' cosg còrr is 10% den teachd a-steach aca air connadh gus an taigh a chumail blath.

'S e na h-Eileanan an Iar an t-àite as miosa ann am Breatainn a thaobh bochdainn connaidh agus còrr air an dàrna cuid de thaighean a' fulang.

'S e a' bhuidheann TEAS a chuir a' cho-labhairt air dòigh is iad a' coimhead ri dè ghabhas dèanamh son an suidheachadh a leasachadh.

"Tha tòrr seann taighean anns na h-Eileanan, taighean mòra le trì no ceithir seòmraichean cadail is tha iad uile 'detached' cuideachd", thuirt oifigear bochdainn connaidh TEAS, Ciorstaidh NicIllinnein.

"Feumaidh iad barrachd teas - tha sin ann - is cuideachd tha an aimsir againn 's dòcha nas miosa na àiteachan eile ann an Alba.

"Feumaidh sinn coimhead ri rudan mar sin airson feuchainn ris na taighean againn a dhèanamh nas fheàrr", thuirt i.

Bidh a' cho-labhart ann Diardaoin ann an taigh-òsda a' Chaladh ann an Steòrnabhagh.