Dàibhear air bàsachadh ann an Leòdhas

Chaidh fireannach, dà fhichead 's a ceithir bliadhna de dh'aois, a mharbhadh ann an tubaist fhad 's a bha e a' dàibheadh sna h-Eileanan Siar.

Chaidh na seirbheisean-èiginn a ghairm gu tràigh Bhòstaidh ann am Beàrnaraigh Leòdhais mu leth-uair an dèidh a còig feasgar na Sàbaid.

Thuirt na Poilis gun deach an dàibhear a thogail chun an ospadail ann an Steòrnabhagh le heileacoptair nam Maor-cladaich.

A dh'aindeoin gach oidhirp a rinn luchd-eiridinn aig an ospadal ge-tà, cha deach aca air a shàbhaladh.

Cha deach ainmeachadh fhathast.