Iarrtas cìsean adhair a ghluasad gu Holyrood

Itealan Flybe
Image caption Tha Flybe an-dràsta a' sgèith trì tursan san là eadar Inbhir Nis agus Gatwick.

Tha Rùnaire na Còmhdhail, Keith Brown, air fiosrachadh iarraidh bho Roinn an Ionmhais air a bhith a' gluasad cumhachd air cìsean adhair gu Pàrlamaid na h-Alba.

Chaidh sin a mholadh le Coimisean Chalman ann an 2009.

Tha dragh mòr ann gum faodadh seirbheisean eadar Inbhir Nis agus Gatwick a bhith ann an cunnart agus Flybe air leigeil fhaicinn gun do reic iad na cothroman cleachdaidh aca aig Gatwick ri Easyjet.

Bha Flybe ag amas air cosgaisean a ghearradh, agus fhuair iad £20m airson nan cothrom èirigh is laighe aig Gatwick, air seirbheisean gu ruige phort-adhair air feadh Bhreatainn.

Thuirt a' chompanaidh gun robh gnothach aig cosgaisean Cìse Adhair (APD) agus cosgaisean laighe air a' cho-dhùnadh aca.

Bidh Easyjet a' gabhail thairis sa Mhàirt an ath-bhliadhna.

An-dràsta, bidh Flybe a' sgèith trì tursan san là eadar Inbhir Nis gus Gatwick - seirbheis a thathas a' faicinn deatamach do dh'eaconamaidh na Gàidhealtachd.

Tha Easyjet cuideachd a' sgèith air an t-slighe, aon turas san là.

Tha dragh ann gun caillear cuid de na seirbheisean a tha an-dràsta eadar an dà chompanaidh, ri linn an aonta.

Tha Cathraiche na buidhne turasachd, VisitScotland, Mike Cantley, cuideachd ag ràdh gum feum Riaghaltas Bhreatainn rudeigin a dhèanamh mu na cosgaisean, 's e ag ràdh gu bheil iad nas àirde na àite sam bith eile san Roinn Eòrpa.

Thuirt Rùnaire an Ionmhais, Danny Alexander, a tha na Bhall Pàrlamaid airson Inbhir Nis, ag ràdh gu bheil ceanglaichean seasmhach eadar a' Ghàidhealtachd 's Lunnainn, deatamach, agus gum feumar cuideam a chur air Gatwick a thaobh nan cosgaisean laighe, ri linn cron air an eaconamaidh.

Ach, tha Dàibhidh Stiubhart BPA ag ràdh nach e a' Chìs Adhair an rud as cudromaiche anns an deasbad seo.

Tha esan ag iarraidh gun tèid òrdugh seirbheis phoblaich a bhuilleachadh air an t-slighe le Pàrlamaid Westminster gus am biodh comas aca air prìsean nas saoire 'son a bhith a' laighe aig puirt-adhair Lunnainn.

Togaidh e a' chùis aig Holyrood Dimàirt.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile