Dithis ciontach de mhurt Liam Aitchison

  • 3 An t-Ogmhìos 2013
Liam Aitchison Image copyright Other
Image caption Chaidh Liam a mhurt anns an t-Samhain 2011.

Chaidh dithis fhear òga fhaighinn cionntach de mhurt an deugaire Eileanaich, Liam Aitchison.

Mhuirt Ionatan MacFhionghain, agus Stefan Millar, a tha le chèile 22 bhliadhna de dh'aois, Liam, a bha 16, ann an taigh ann an Stèinis faisg air Steòrnabhagh ann an Leòdhas san t-Samhain 2011.

Tha dùil gun tèid binn a chur orra air 28mh an t-Ògmhios.

Chuala an Àrd-Chùirt ann an Glaschu gun robh iad air Liam a shàthadh grunn tursan, gun do bhuail iad e le botal, 's gun do stamp iad air a cheann.

'S e a' chiad mhurt a thachair anns na h-Eileanan Siar airson còrr is 40 bliadhna.

Bhuinneadh Liam do dh'Uibhist a Deas, agus bha e na dhrumaire ann an còmhlan-pìoba, a thuilleadh air a bhith na bhall de Phàrlamaid na h-Òige.