Dragh mu aiseagan Uibhist

MV Hebrides Image copyright Undiscovered Scotland
Image caption Luchd-siubhail a' gearain nach eil àite air liosta-feitheimh an còmhnaidh ga thairgsinn dhaibh nuair a tha an t-aiseag làn

Tha feadhainn ann an Uibhist a' gearain nach eil luchd-siubhail an còmhnaidh a' faighinn cothrom air liosta-feitheimh an aiseig, nuair a tha seirbheisean Chaledonian Mhic a' Bhruthainn làn ro làimhe.

Bha Michealina Nic Ill Fhaolain ag iarraidh siubhail eadar an t-Òban agus Barraigh an t-seachdainn sa chaidh ach chaidh ìnnse dhith nach robh àite air an aiseag airson carbad.

Thuirt i nach deach àite a thairgse dhith air liosta-feitheimh an aiseig.

Nuair a chaidh i air an aiseag, às aonais a' chàr aice, mhothaich i gun robh àite oirre airson tuilleadh chàraichean.

Aiseagan làn

Thuirt Cal Mac gun robh grunn dhaoine a bh' air àitean a chuir air dòigh air innse dhaibh goirid mus do sheòl an t-aiseag nach b' urrainn dhaibh siubhail.

Thuirt iad cuideachd gun robh e a' cur iongnadh orra nach deach àite air liosta-feitheimh a thairgse.

Thuirt an Comh. Raghnall MacFhionghain gun robh cho làn 's a bha na h-aiseagan bho chionn ghoirid a' dearbhadh gu bheil feum air seòlaidhean a bharrachd eadar Uibhist agus Tìr Mòr - agus gur e seirbheis eadar Malaig agus Loch Baghasdail a tha dhìth.

Thuirt e gur e suidheachadh àraid dha-rìribh a th' ann nuair a tha barrachd sheòlaidhean gu bhith aca tro mhìosan a' gheamhraidh na bhios as t-samhradh.