150 cosnadh aig BT

Bidh 90 de na dreuchdan air Ghàidhealtachd.

Cruthaichidh BT 150 dreuchd innleadaireachd an Alba is iad a' cur bann-leathainn luath an sàs.

Thuirt a' chompanaidh gum bi 90 de na cosnaidhean air a' Ghàidhealtachd, leis a' chòrr an Dùn Dè, Obar Dheathain, meadhan agus ceann a deas na h-Alba.

Bidh dreuchdan na Gàidhealtachd an Inbhir Nis, anns a' Ghearasdan agus anns an Òban.

Choisinn BT cùmhnantan gus ceanglaichean a stèidheachadh air feadh na dùthcha.

Tha BT den bheachd gum bi cothrom aig 85% de dhaoine air bann-leathainn luath ro 2015 agus gum faigh 95% e ro 2017.

Chuir Leas-Phrìomh Mhinistear na h-Alba Nicola Sturgeon fàilte air an naidheachd mu na h-obraichean.

Bha i ag ràdh cuideachd gun toir am bann-leathainn luath cothrom do choimhearsnachdan an eaconomaidh a leasachadh anns an àm ri teachd.