Gearan mu sheirbheis aiseig
- Air fhoillseachadh
Tha daoine ann an Colla 's Tiriodh a' gearan mun t-seirbheis-aiseig aig Caledonian Mac a' Bhriuthainn thar a' Gheamraidh.
A rèir nan eileanach bu chòir dhan t-seirbheis a bhith an ìre mhath an aon rud ris na th' aca tron t-Samhradh, is tha iad mì-thoilichte nach eil clàr-ama a' Gheamhraidh air an làraich-lìon aig Cal Mac fhathast.
Chan eil ach beagan a bharrachd air còig seachdainean mus tòisich seirbheisean-geamhraidh agus tha cuid mì-thoilichte nach urrainn dhaibh ticeadan a cheannach gus an tèid an clàr-ama fhoillseachadh.
Chan eil iad air an dòigh nas motha gum bi na Hebridean Isles a' dol air an t-slighe sa Gheamhradh an àite a' Chlansman.
"Fiadhaich math"
"An-uiridh bha sinn cleachdte ris a' Chlansman is cha do mhiss an Clansman mòran de laitheachan is thug i dhuinn seirbheis fiadhaich math air fad", thuirt Alasdair MacAonghais bhon Chomataidh Chòmhdhail ann an Tiriodh.
"Tha iad ag ràdh am bliadhna gur e an aon bhàta a tha air fhàgail 's e am Hebridean Isles. Bàta math gu leòr ann an Abhainn Chluaidh math dh'fhaoidte ach chan eil mi a' smaointinn gum bi i fiadhaich math a-mach anns a' Chuan Shiar an seo co-dhuibh", thuirt e.
Thuirt Caledonian Mac a' Bhriuthainn gum feum iad beachdachadh air an lìonra de sheirbheisean air fad a th' aca nuair a tha iad a' cur bàtaichean air slighean rè-ùine tron Gheamhradh.
Thuirt iad gun tèid an càineadh as bith dè nì iad ach gu bheil iad a' dèanamh co-dhùnaidhean son maith na lìonra air fad.
Thuirt iad gu bheil iad a' bruidhinn ri coimhearsnachdan mu na planaichean a th' aca agus nach biodh e freagarrach an còrr a ràdh gus am bi an co-chomhairlicheadh aca seachad.