An MV Isle of Lewis ga càradh

Image caption Tha Cal Mac an dòchas gum bi an t-aiseag air ais ann an Steòrnabhagh Diardaoin

Tha Caledonian Mac a' Bhriuthainn ag ràdh gu bheil iad an dòchas gum bi an t-aiseag an Isle of Lewis, a bhios a' seòladh eadar Ulapul agus Steòrnabhagh, air ais air an t-slighe Diardaoin, aig a' char as tràithe.

Bhris i aig an deireadh sheachdainn, às dèidh do chliabh a dhol an lùib siostam propeileir an aiseig.

Tha obair càraidh a-nis ga dèanamh oirre ann an Grianaig.

Atharrachaidhean

'S an MV Hebrides, a tha a' frithealadh slighe an Tairbeirt, Ùig agus Loch nam Madadh, a th' air slighe Ulapuil an-dràsta, le aiseag Ìle, an MV Finlaggan, a' gabhail a h-àite-se.

Bha dragh ann gum faodadh trioblaid a bhith ann aig deireadh na seachdainn-sa mura biodh an Isle of Lewis air ais mus dùin na sgoiltean, ach thuirt Cal Mac nach robh iad a' sùileachadh duilgheadas le gainnead rùim air an aiseag.