Beartan air màl bho Mhuillinn Shiaboist
- Air fhoillseachadh
Tha Muileann Chlò Shiaboist ann an Leòdhas an dùil sia beartan ùra fhaighinn airson a thoirt air màl dha breabadairean a tha a' tòiseachdainn as ùr ann an gnìomhachas a' Chlo Mhòir.
Cosgaidh e mu £12,000 beart a cheannach, rud a tha a' cur bacadh air feadhainn bho a bhith a' feuchainn air an obair.
Chuir Cathraiche Aonadh nam Breabadairean, Niall MacLeòid, fàilte air oidhirp na muilne barrachd dhaoine a thàladh chun a' ghnìomhachais.
"Rud sam bith a tha a' dol a leudachadh a' ghnìomhachais, tha e gu bhith na chuideachadh," thuirt e.
"Tha seo eadar-dhealaichte seach an rud a bha sinne cleachdte. Thàinig oirnn na beartan againn fhìn a cheannach.
"Air mo shon fhìn, b'fheàrr leam beart a bhith agam fhìn. Faodaidh mi an rud a thogras mi a dhèanamh leatha.
"Ach a' cantainn sin, tha e a' toirt cothrom dha daoine eile, 's dòcha daoine nach eil airgead aca airson beartan a cheannach.
"Bidh e math barrachd bheartan fhaicinn anns a' ghnìomhachas, agus bhiodh e falain barrachd dhaoine òga fhaicinn a' tighinn a-steach dhan ghnìomhachas," thuirt e.