Dìon air co-dhùnadh ceannard sgoile

Bun-sgoil Ghàidhlig Inbhir Nis
Image caption Tha Mgr Lyon ag ionnsachadh na Gàidhlig.

Chuir Comhairle na Gàidhealtachd dìon air a' cho-dhùnadh duine nach eil fileanta sa Ghàidhlig fhastadh mar cheannard air Bun-sgoil Ghàidhlig Inbhir Nis.

Tha iad air a bhith a' feuchainn ri cuideigin a chur dhan dreuchd fad ceithir bliadhna.

Chaidh dreuchd ceannard na sgoile a thoirt dha Seumas Lyon, a tha air a bhith na cheannard eadar-amail bho chionn faisg air bliadhna.

Chan eil e fileanta sa Ghàidhlig, ach tha e ga h-ionnsachadh.

Bha cuid de phàrantan ag iarraidh gum biodh Gàidhlig aig a' cheannard ùr, agus thathas a' tuigsinn gun robh co-dhiù aon neach a fhuair agallamh airson na dreuchd Dihaoine fileanta.

Thuirt cathraiche Comataidh nan Seirbheisean Inbheach agus Cloinne aig Comhairle na Gàidhealtachd, Alasdair Christie, gun robh e a' gabhail ris gun robh cuid de phàrantan ag iarraidh ceannard dà-chànanach a bhith air an sgoil, ach gun robh e a' faireachdainn gun robh an t-ùghdarras ceart ann a bhith a' co-dùnadh an dreuchd a thoirt do Mhgr Lyon.

Tha Mgr Christie ag ràdh gu bheil an sgoil air a bhith fo stiùir mhath sa ghreis mu dheireadh agus gun toir seo cothrom dhan sgoil gluasad air adhart agus cuirreacalam 'son sàr-mhaitheis, a tha freagarrach 'son sgoil Ghaidhlig, a chur an sàs.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile