Co-chomhairleachadh nan MPA seachad
- Air fhoillseachadh
Tha co-chomhairleachadh air lìonra de Sgìrean Dìon Mara (MPA) timcheal chosta na h-Alba a' tighinn gu ceann Diciadain.
Tha sgìrean MPA ag amas air fiadh-bheatha agus àrainneachd na mara a dhìon.
Tha cuid de bhuidhnean glèidhteachais ag ràdh nach eil iad a' dol fada gu leòr, ach aig a' cheart àm tha iasgairean anns na h-Eilanan an Iar air draghan a thogail mun bhuaidh a dh'fhaodadh iad a thoirt air a' ghnìomhachas aca.
Chaidh 33 làraichean ann an Alba ainmeachadh mar àitichean far am faodadh MPA a bha stèidhichte, bho Shealtainn gu Cluaidh.
Tha na làraichean sin a' comharrachadh 12% de dh'uisgeachan na h-Alba air fad.
Tha an Riaghaltas a' cumail a-mach gum bi iad cudromach ann a bhith a' toirt àrainneachd mhara fhalainn, thorraich agus mheasgaichte gu buil.
Rinn a' bhuidheann ghlèidhteachais an RSPB càineadh air na planaichean, 's iad ag ràdh gur beag a tha iad a' dèanamh airson eòin mhara na h-Alba a dhìon.