Aiseag air ruith eadar Loch Baghasdail is Malaig
Image copyright
Undiscovered Scotland
Sheòl a' chiad aiseag ann an sgeama pìleat eadar Loch Baghasdail agus Malaig feasgar Disathairne.
Chaidh na trì seòlaidhean roimhe seo - Dimàirt, agus madainn Disathairne, a chur dheth ri lìnn na droch shìde.
Tha beachd ann an Uibhist gum bu chòir an t-seirbheis a bhith ann fad na bliadhna.
Bha muinntir an eilein a' strì o chionn iomadh bliadhna airson an t-seirbheis a chur a Mhalaig mar a b'àbhaist, seach dhan Òban.
Fasgadh
Bha an Loch Mòr a' frithealadh Uibhist, agus àiteachan eile, a-mach à Malaig gu 1964. Ach bha an t-slighe mu dheireadh eadar Loch Baghasdail agus Malaig anns na 1990an.
"Nuair a bha mi a' dol a dh'fhalbh a dh'obair aig seachd bliadhna deug, 's ann air an aiseag a thàinig mi tarsainn gu Malaig," thuirt Agnes Nic an t-Saoir.
"Sin a' chiad uair a bha mi air bàta, agus air trèana, a thug a Ghlaschu mi," thuirt i, agus i air bòrd a' chiad sheòlaidh den t-seirbheis ùir.
Tha an seòladh eadar Loch Baghasdail agus Malaig nas giorra, agus tha barrachd fasgaidh ann, na an seòladh dhan Òban.
Bha feadhainn às Uibhist a Tuath, Beinn nam Fadhla, agus Barraigh air an t-seòladh Disathairne.
"'S e seirbheis gu math freagarrach a tha seo, agus b'fheàrr leam fhìn gun robh an t-seirbheis a tha seo a' ruith à Barraigh a Mhalaig," thuirt Dòmhnall Caimbeul, à Barraigh.
"Agus tha mi an dèis a bhith ag ràdh sin o chionn deagh ùine a-niste. Bhiodh e fada fada na b'fheàrr seach a bhith a' dol dhan Òban," thuirt e.
Tha gun deach trì seòlaidhean a chur dheth ri linn na droch shìde, a' cur ris an iarrtas gun tèid an t-seirbheis a ruith as t-Samhradh.
"Tha iad a' dèanamh an deuchainn a tha seo airson trì bliadhna air feadh a' Gheamhraidh," thuirt Mgr Caimbeul.
"Chanainnsa gum biodh e nas fhreagarraiche seo a dhèanamh as t-Samhradh, agus gheibheadh iad leughadh nas fheàrr dè cho tarraingeach 's a bhitheadh an t-seirbheis.
"Fada fada na b'fheàrr as t-Samhradh. Ach chan eil e gu diofar dè an t-seirbheis a th' ann aig an àm seo den bhliadhna, cuiridh an aimsir dheth na seirbheisean," thuirt e.
Chan e muinntir Uibhist is Bharraigh a-mhàin a tha a' cur fàilte air an t-seirbheis ùir ge-tà, agus muinntir Mhalaig a' faicinn gum faigh iadsan buannachd àiste cuideachd.
"Ma thèid thu suas an cnoc a tha sin, Cnoc Mhalaig, chì thu a' Bheinn Mhòr is Uibhist a Deas a-nall," thuirt Ailean MacEanraig, a tha a' fuireach am Malaig.
"Nise, ma 's math mo chuimhne, cha dèanadh tu sinn anns an Òban.
"Tha rathad ùr againn a-nis eadar Malaig is an Gearasdan.
"Mar a tha fhios againn uile, tha an t-iasgach an seo a' dol dheas.
"Agus mar sin, tha e cudromach rud sam bith fhaighinn a tha a' cumail na coimhearsnachd seo beò agus a' cumail obair agus airgid anns an àite seo fhèin," thuirt e.
Tha cuid den bheachd gu bheil na h-Eileanan Beaga a' dèanamh na slighe nas sàbhailte na an t-slighe dhan Òban cuideachd.
"Tha thu san fhasgadh fad an t-siubhail," thuirt Mìcheal Curry, a tha a' teagasg sgilean na mara aig Colaiste Taobh Siar na Gàidhealtachd.
"Ma thig thu a-mach à Malaig, chan eil e gu diofar dè an rathad a tha a' ghaoth, tha fasgadh nan eileanan agad.
"Tha fasgadh an Eilein Sgitheanaich a-muigh san tuath, fasgadh Rùim is Eige 's Canaigh a-muigh anns an deas, agus nuair a gheibh thu a-mach ceann Chanaigh, tha fichead mìle agad ri dhol tarsainn a dh'ionnsaigh Loch Baghasdail, 's tha fasgadh nan eileanan thall an an sin agad.
"Ma tha thu a' tighinn a-nuas rathad an Òbain, tha thu a' fàgail Loch Baghasdail, 's tha 40 no suas ri 50 mìle agad ri dhol mun tig thu a-staigh am fasgadh Caoil Mhuile.
"Tha sin a' dèanamh diofair mhòir sa Gheamhradh fhèin.
"Bheir e feadhainn a-steach. Thig iad a-nall à Uibhist sa mhadainn, 's faodaidh iad a dhol air ais feasgar,
"Gheibh iad trì uairean an uaireadair no an còrr shuas sa Ghearasdan," thuirt e.
Bidh an aiseag ùr a' ruith dà là san t-seachdain, Dimàirt agus Disathairne.
Fàgaidh i Loch Baghasdail aig 06:0m, agus bidh i ann am Malaig aig 09:30m.
Tillidh i an uair sin aig 09:45m, 's a' ruigsinn Uibhist aig 1:15f.
Bidh dà sheòladh ann feasgar cuideachd, a' fàgail Uibhist a Deas aig 2:00f, agus a' falbh à Malaig aig 6:15f.