Lagh dùnadh sgoiltean gus atharrachadh

Image copyright bbc

Image caption Dh'fheumadh fiosrachadh mionaideach mu ionmhas na sgoile a bhith air fhoillseachadh mus dùin i.

Tha Riaghaltas na h-Alba am beachd an lagh a thaobh a bhith a' dùnadh sgoiltean dùthchail, às dèidh ath-sgrùdaidh air foghlam air an tuath atharrachadh.

Chaidh Coimisean Lìbhrigidh an Fhoghlaim Dhùthchail a chur air bhonn o chionn dà bhliadhna, às dèidh connspaid mu dhùnadh sgoiltean anns na h-Eileanan Siar, agus ann an Earra-Ghàidheal is Bòd.

Am measg nam molaidhean a tha an Riaghaltas a-nis gus cur san lagh, tha gum bi pròiseas a' cho-dhùnaidh as tro-fhaicsinnich gus am bi pàrantan agus coimhearsnachdan nas fhiosrachaile, agus gus am faod iad pàirt a ghabhail ann.

Tha iad cuideachd air am poileasaidh gum bu chòir a bhith an dùil gun sgoiltean dùthchail a dhùnadh a shoillearachadh.

Dh'fheumadh cuideachd fiosrachadh mionaideach ionmhasail mu sgoiltean a bhith air fhoillseachadh le ùghdarrasan ionadail a dh'iarradh sgoil a dhùnadh.

Dh'fheumadh oifigich cuideachd a bhith a' sìor-shealltainn gur ann gu maith foghlaim na cloinne a bhiodh dùnadh sgoile.