Stiùidio
Cha chluich seo air an uidheamachd agaibh

Naidheachdan 11:00m

21 An t-Samhain 2013 Ùraichte aig Ùraichte aig

Èirinn a Tuath

Dh'aidich ceathrar shaighdear a bh' ann am meur sònraichte de dh'Arm Bhreatainn a bha ag iomairt an aghaidh an IRA ann an Èirinn a Tuath sna 70an gun do mharbh iad sìobhaltaich aig nach robh armachd. Tha am fiosrachadh a' tighinn am follais ann am prògram Panorama aig a' BhBC a thèid a chraoladh a-nochd. Tha Ministreachd an Dìon air a' chùis a thoirt gu aire nam Poileas.

Cosgaisean na h-Alba

Tha figearan ùra bho Roinn an Ionmhais ag ràdh gu bheil cosgais ann an Alba a rèir an t-sluaigh £1,300 nas motha na tha sa chòrr den Rìoghachd Aonaichte. Tha an t-suim sin aig beagan a bharrachd air £10,150 an duine an Alba, an coimeas ri £8,500 aig an ìre as lugha ann an Sasainn. Thuirt Àrd-Rùnaire an Ionmhais, Danny Alexander, gu bheil sin a' dearbhadh gu bheil muinntir na h-Alba a' faighinn buannachd, agus nach bu chòir dhaibh sin a chur ann an cunnart le dealachadh ris an Rìoghachd Aonaichte.

Neo-eisimeileachd

Dh'iarr Prìomh Mhinistear na Cuimrigh, Carwyn Jones, air Alba fuireach anns an Rìoghachd Aonaichte. Bha esan a' bruidhinn ann an Dùn Èideann an-raoir, agus thuirt e gu bheil teagamh ann cuideachd am bitheadh àite aig Alba neo-eisimeilich anns an aon shiostam ionmhais ris a' chòrr den Rìoghachd Aonaichte.

Pòsaidhean Gèidh

Thuirt am Ministear a tha aig meadhan na connspaid ann an Eaglais na h-Alba mu mhinistearan gèidh gu bheil e an dòchas gun atharraich an eaglais a beachd air pòsaidhean gèidh. Bha an t-Urr. Scott Rennie, a tha gèidh, a' bruidhinn an dèidh do Phàrlamaid na h-Alba taic a thoirt ann am prionnsabal an-raoir do phòsadh eadar dìthis den aon ghnè. Tha Eaglais na h-Alba, agus an Eaglais Chaitligeach am measg na tha a' cur an aghaidh sin.

Paul Flowers

Chuir an ceannard Làbarach, Ed Miliband, dìon air càirdeas nan Làbarach ri Paul Flowers, a bha na cheannard air Banca a' Cho-op. Thuirt Mgr Miliband nach do rinn am Pàrtaidh Làbrach dad ceàrr. Tha rannsachadh ann an-dràsta mu chasaidean gun do cheannaich Mgr Flowers drogaichean mì-laghail.

Seirbheisean CalMac

Tha sgrùdadh air seirbheisean Chaledonian Mhic a' Bhriuthain ag ràdh gu bheil mòran a bharrachd ag iarraidh seòladh orra na th' ann de dh'àite dhaibh. Agus tha an sgrùdadh ag ràdh, ged a bhitheadh àite air na h-aiseagan, nach eil dòigh cheart ann air sin innse do dhaoine air an là a dh'iarradh iad seòladh, agus gu bheil, le sin, na h-Eileanan a' call luchd-turais. Thuirt comhairlichean Uibhisteach gu bheil sin na dhearbhadh air gum bu chòir bàta a bhith a' seòladh eadar Loch Baghasdail agus Malaig fad na bliadhna.

Amsterdam

Thèid sianar de luchd-taic Celtic dhan chùirt ann an Amsterdam feasgar. Tha iad fo chasaid gun tug iad ionnsaigh air oifigearan poilis nuair a bha Celtic a' cluich Ajax anns an Champions League bho chionn cola-deug.