Stiùidio
Cha chluich seo air an uidheamachd agaibh

Naidheachdan 11:00m

9 An Dùbhlachd 2013 Ùraichte aig Ùraichte aig

An Creideas Coitcheann

Nì buill ann am Pàrlamaid Westminster ceasnachadh an-diugh mu carson nach tèid atharrachadh ann an siostam nan sochairean a chur an sàs gu an dèidh 2017. Thèid faighneachd do Rùnaire na h-Obrach 's nam Peinnsean, Iain Donnchadh Mac a' Ghobhainn, mu dhàil ann an siostam a' Chreidis Choitchinn a chur an sàs agus aithris ann gur e trioblaidean IT as coireach.

Tiodhlacaidhean

Tha tiodhlacadh dithis eile ann an-diugh a chaill am beatha ann an tubaist heileacoptair Ghlaschu anns an deach naoinear a mharbhadh. Tha tiodhlacadh Mark O'Prey, a bha 44, a' dol air adhart an-dràsta ann an Cille Brìghde an Ear, agus bidh an tiodhlacadh aig Garry Arthur, a bha 48, ann am Pàislig feasgar.

Brathadh Stàite

Chuir Google, Microsoft, Facebook agus Twitter litir còmhla dhan Cheann-suidhe Obama ag iarraidh atharrachadh san lagh sna Stàitean Aonaichte. Tha iad ag iarraidh stad a chur air an Stàit bho a bhith a' cruinneachadh fiosrachaidh mar a chaidh a thoirt am follais nuair a dh'innis Eideard Snowden, a bha ag obair dha na seirbheisean tèarainnteachd, mun t-seòrsa chleachdaidhean a tha a' dol air adhart. Tha an litir ag ràdh gum feum atharrachadh mòr a thoirt air an lagh ann an Aimeireaga agus ann an dùthchannan eile.

Buaidh na Dibhe

Tha 20 duine gach seachdain sa chumantas a' bàsachadh le buaidh na dibhe an Alba, ged a tha na h-àireamhan a' tuiteam. Thuirt oifigich slàinte gu bheil dragh orra gu h-àraid mu bhoireannaich eadar mu 30 bliadhna de dh'aois agus 50 a dh'fheumas a dhol dhan ospadal le trioblaidean co-cheangailte ri deoch-làidir.

Thailand

Thuirt Prìomhaire Thailand gum bi taghadh coitcheann eile ann, agus àr-a-mach às ùr air èirigh an aghaidh a Riaghaltais. Tha aithrisean ann gu bheil sluagh mòr a' cruinneachadh aig togallach an Riaghaltais, agus iad a' gealltainn blàr gus an cuir iad am Prìomhaire às a dreuchd.

Buidhnean Saor-thoileach

Tha a h-uile coltas gum bi atharrachadh eile a dh'aithghearr ann an structar nam buidhnean saor-thoileach ann an Uibhist. Chaidh Buidhnean Saor-thoileach Uibhist fo bhratach An Treas Roinn Innse Gall ann an 2009, ach tha e coltach nach do dh'obraich sin, agus gun tèid buidheann ùr a stèidheachadh a dh'aithghearr, le coinneamh èiginn gu bhith ann air a' chùis anns an Fhaoilleach.

Ball-coise

Tha e air tighinn am follais gu bheil an cluicheadair ball-coise aig Blackburn Rovers, DJ Caimbeul, air fear de shianar a tha an grèim co-cheangailte ri amharas mu match fixing ann an Sasainn. Tha seo mar phàirt de rannsachadh nas fharsainne a tha a' dol air adhart an dèidh aithris anns a' phàipear-naidheachd an Sun.