Sùil air: Alistair MacIlleMhìcheil

Image copyright PA
Image caption San Dàmhair 2013, chaidh Mgr MacIlleMhìcheil a chur an àite Mìcheal Moore mar Rùnaire Stàite na h-Alba.

Ainm: Alistair MacIlleMhìcheil BP

Dreuchd: Rùnaire Stàite na h-Alba

Iomairt san referendum: Nas Fheàrr Còmhla

Pàrtaidh poilitigeach: Na Libearalaich Dheamocratach

Seasamh air neo-eisimileachd: Airson gum fuirich Alba san Rìoghachd Aonaichte

Eachdraidh poilitigeach

Thogadh Alistair MacIlleMhìcheil ann an Ìle.

Às dèidh dha bhith na mhanaidsear taigh-òsta agus an uair sin na fhear-lagha, chaidh e an sàs ann am poilitigs.

Tha e air a bhith na bhall Lib-Deamach ann am Pàrlamaid na Rìoghachd Aonaichte bho 2001, nuair a ghlèidh e an seat a bha roimhe aig Jim Uallas, a' riochdachadh Arcaibh agus Sealtainn.

Nuair a chaidh na Lib-Deamaich an sàs anns a' cho-bhanntachd leis na Tòraidhean ann an 2010, chaidh fhastadh mar leas chuip an Riaghaltais.

San Dàmhair 2013, chaidh Mgr MacIlleMhìcheil a chur an àite Mìcheal Moore mar Rùnaire Stàite na h-Alba.

Beachdan air an referendum

Tha Mgr MacIlleMhìcheil gu mòr airson gum fuirich Alba na pàirt den Rìoghachd Aonaichte. Seo cuid de na tha e air a bhith ag ràdh mun chuspair:

"Tha fios againn gum feumadh na bunaitean air am biodh neo-eisimileachd gu bhith stèidhichte a bhith air an deasbad agus aontachadh le iomadh dùthaich eile, nam measg an còrr den Rìoghachd Aonaichte agus an Aonadh Eòrpach. Bhiodh iomradh onarach mu na dùbhlain agus am mì-chinnt an lùib a bhith a' fàgail an RA air a bhith feumail san deasbad eadar seo agus an t-Sultain. Na àite fhuair sinn liosta mhiannan gun phrìsean."

"Tha Riaghaltas na h-Alba airson gun creid daoine gu bheil sealladh aca den àm ri teachd, chan eil iad a' tabhainn ach mirage."