Briseadh-dùil do luchd-bathair

Sheall rannsachadh gun robh eaconamaidh nan Eileanan Siar, Thiriodh agus Cholla air fulang ri linn mar a chaidh RET airson charbadan-bathair a thoirt air falbh.

Cha deigheadh RET a thabhann do luchd-bathair nan eilean fo riaghaltas SNP ann an Alba neo-eisimeileach, a rèir Mhinistear na Còmhdhail, Keith Brown.

A' bruidhinn aig co-labhairt còmhdhail ann an Dùn Èideann Dimàirt, thuirt e gur ann a tha iad ag amas air loidhne rèile fìor luath, seirbheisean adhair a leudachadh, agus ceanglaichean rathaid eadar na bailtean mòra a neartachadh.

Nuair a chaidh fhaighneachd dha am biodh RET ga thabhann do luchd-bathair, thuirt e nach robh dùil sam bith aca sin a dhèanamh.

Chaidh RET a thoirt do luchd-bathair nan eilean ann an sgeama pìleat san Dàmhair 2008.

Anns a' Ghiblean 2012 thàinig an sgeama gu crìch, ach tha luchd-iomairt air a bhith a' strì on uair sin airson fhaighinn air ais.

Fulang

An-uiridh sheall rannsachadh a dh'iarr an Riaghaltais gun robh eaconamaidh nan Eilean Siar, Thiriodh agus Cholla air fulang ri linn mar a chaidh RET airson charbadan-bathair a thoirt air falbh.

Aig a' cho-labhairt, dhearbh Mgr Brown nach robh dùil aca RET a thoirt do luchd-bathair ann an Alba neo-eisimeileach, ach gun robh dùil aca sgrùdadh a dhèanamh air faraidhean coimearsalta anns an fharsaingeachd.

Thuirt e gun robh iad airson RET a chumail mar a bha e ann an Alba neo-eisimeileach agus gun robh e ag obair airson daoine a bha a' fuireach anns na h-eileanan.

A rèir Mhgr Brown, le smachd air buidseatan, thèid aca air seirbheisean aiseig anns an fharsaingeachd a neartachadh.