Mì-thoileachas mu chidhe Bhàgh Bhatarsaigh
- Published
image copyrightUndiscovered ScotlandDh'èirich eas-aonta mu leasachadh a tha ga dhèanamh air cidhe Bhàgh Bhatarsaigh.
Tha mì-thoileachas am measg iasgairean an eilein agus iad ag ràdh nach eil an leasachadh a tha ga dhèanamh air a' chidhe freagarrach dhaibh-san.
Tha dragh orra cuideachd gu bheil dàil air an obair, a tha a' cosg £140,000.
B' e deireadh an Dàmhair ceann-là crìochnachaidh an obair-leasachaidh, ach chaidh sin a chur air ais gu deireadh na Dùbhlachd.
Briseadh-dùil
Tha mu chairteal den obair fhathast ri dhèanamh agus tha an dàil sin na bhriseadh-dùil do na h-iasgairean.
Chaidh an rathad gu cidhe Bhatarsaigh ath-shuidheachadh agus tha balla air a chur na thacsa, le balla eile air taobh sear a' chidhe airson dìon bhon fhairge.
Ach, o chionn ghoirid, ràinig làn àrd suas gu fada seachad air a' bhalla agus tha sin na dhragh don t-iasgair Eòin MacNèill.
"Chan eil e gu mòran feum nuair a tha an làn a' tighinn seachad air nuair a tha reothairt ann.
"Cha deach a dhèanamh mar a bha còir aige a bhith air a dhèanamh agus chan eil e gu mòran feum dhuinne," thuirt Mgr MacNèill.
Gearain
Tha concrait fhathast ri chur air uachdar a' bhalla agus tha àite tionndaidh airson innealan fhathast ri dhèanamh.
Tha na h-iasgairean air gearainean a dhèanamh ri Comhairliche an eilein, Dòmhnall Manford.
"Tha e riatanach, ge bith gu dè bhios air a chrìochnachadh, gu bheil e fut airson an obair a thig roimhe.
"Tha e follaiseach an-dràsta, nam bheachd-sa, gum bu chòir barrachd àirde a chur ris, gu h-àraidh mar a tha an làn a' tighinn os a chionn," thuirt Mgr Manford.
Àirde
Bheachdaich Mgr Manford cuideachd gur dòcha gum feumar tuilleadh obair a dhèanamh air a' chidhe gus a dhèanamh nas neartaile na tha e.
Thuirt manaidsear na pròiseict, Tony Robson, nach robh e riamh san amhairc àirde a chur anns a' chidhe fhèin.
Thuirt e gur dòcha gum biodh barrachd obair leasachaidh air a dhealbhachadh, agus an lùib sin gum biodh balla cloiche sàbhailteachd.
Thuirt e cuideachd gum bi e a' coimhead air an obair aig deireadh a' Ghearain, agus a' tachairt ris na buidhnean a tha a' buntainn ris airson slighe air adhart aontachadh.