Dachaigh chùraim ga ceannach

The fire at Culloden Court Image copyright Other
Image caption Chaidh an dachaigh chùraim na theine o chionn còrr is trì bliadhna.

Fhuair Comhairle na Gàidhealtachd sealbh air làrach seann dachaigh chùram Chùirt Chùil Lodair ann an Inbhir Nis.

Tha dà roghainn ann airson na làraich a th' ann am Baile a' Ghobhainn.

Dh'fhaodar a dhèanamh na ionad do chloinn chiorramach, no dachannan airson seann daoine.

Chaidh an dachaigh chùraim a sgrios le teine bho chionn còrr air trì bliadhna, 's fhuair a' Chomhairle a-nis sealbh air tron Mhaoin Fhearainn aca.

Bheir an t-ùghdarras ionadail cothrom a-nis do Chaidreachas Elsie Normington airgead a thrusadh gus ionad a thogail do chloinn a tha ciorramach.

Bidh dà bhliadhna aca sin a dhèanamh, agus ma gheibh iad air adhart, faodaidh iad an talamh a cheannach bhon Chomhairle, no a ghabhail air màl, gus an tèid airgead na maoine a phàigheadh air ais.

Mur a soirbhich leis a' chaidreachas, tha cead dealbhachaidh ann am prionnsabal aig a' Chomhairle airson 17 taighean a thogail do sheann daoine.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile