Dealbhan CCTV gan sgaoileadh an dèidh mèirle le gunna

Dealbh CCTV Image copyright Poileas na h-Alba
Image caption Dealbh CCTV den duine ann an sgìre Queensgate

Tha na Poilis ann an Inbhir Nis air dealbhan CCTV a sgaoileadh de dhuine a tha fo amharas gun do rinn e mèirle le gunna air bùth gheall sa bhaile.

Nochd an duine ann am bùth Paddy Power ann an sgìre Queensgate timcheall air 09:30m Didòmhnaich.

Thuirt na Poilis gu bheil iad den bheachd gu bheil an dà ìomhaigh a th' aca a' sealltainn an aon duine, ach gu bheil e air aodach atharrachadh anns an dàrna dealbh.

Image copyright Poileas na h-Alba
Image caption Tha dùil gun robh geansaidh soilleir-ghorm coltach ris an fhear seo air a' mhèirleach

Chaidh dealbh de gheansaidh soilleir-ghorm Adidas cuideachd a sgaoileadh, 's dùil gu bheil e coltach ris an fhear a bh' air a' mhèirleach.

Thathas a' tuigsinn gun robh gunna-làimhe aige agus e a' bagairt air luchd-obrach.

Thèich e le na mìltean notaichean.

Image copyright Poileas na h-Alba
Image caption Dealbh CCTV den duine a' coiseachd fo Dhrochaid nam Manach.

Chaidh fhaicinn às dèidh làimh a' dol tarsainn Sràid na h-Eaglaise agus Drochaid Sràid a' Ghreigich, mus deach e fo Dhrochaid nam Manach.

Thuirt na Poilis gun robh an duine geal agus mu shia troighean de dh'àirde.

Bha seacaid bhomair dhubh air, le geansaidh soilleir-ghorm, balaclàbha dubh, briogais chargo dhubh agus brògan dubha.

Stad e greiseag airson geansaidh dearg is dubh agus ad dhubh a chur air, agus às dèidh greis eile chuir e air lèine-t dhorcha agus seann jeans dhubh.

Bha poca mòr dubh aige na làimh.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile