Dearbhadh mu rèile-beinne a' Chairn Ghuirm

Dh'innis HIE sa Ghearran gur iad Natural Retreats am prìomh thagraiche airson cùmhnant a' Chairn Ghuirm.

Tha companaidh ùr gu bhith a' stiùireadh an ionad sgithidh as trainge ann an Alba, faisg air An Aghaidh Mhòir.

Tha luchd-seilbh Beinn a' Chàirn Ghuirm, Iomairt na Gàidhealtachd 's nan Eilean (HIE), air a' bhuidheann thurasachd, Natural Retreats, fhastadh airson rèile-beinne a' Chairn Ghuirm, agus na goireasan a tha na chois, a ruith.

Bha an taghadh eadar Natural Retreats agus Serco, companaidh a tha a' ruith grunn sheirbheisean eadar-nàiseanta.

Dh'innis HIE sa Ghearran gur iad Natural Retreats am prìomh thagraiche airson cùmhnant a' Chairn Ghuirm.

'S ann le HIE a tha an Carn Gorm Earranta, agus gabhaidh Natural Retreats, a tha stèidhichte ann an Wilmslow ann an Cheshire, uallach obair-stiùiridh na buidhne.

Pròiseactan

Tòisichidh an cùmhnant, a' mhaireas 25 bliadhna, anns an Ògmhios.

Thuirt Natural Retreats gun cuireadh iad £6.2m a-steach dhan chompanaidh thairis air an ath chòig bliadhna. Tha HIE cuideachd air iasad de £4m a thoirt don bhuidheann airson loidse ùr a stèidheachadh.

Tha Natural Retreats air a' Ghaidhealtachd mar-thà.

'S iad a tha air cùlaibh an obair-leasachaidh luach nam milleanan aig Taigh-òsta Taigh Iain Ghròt, agus 's iad cuideachd a tha ag amas air goireas turasachd còig rionnagan a stèidheachadh ann an Caisteal Leòdhais.

Ged a bhios a' chompanaidh ùir a' stiùireadh na rèile-beinne fad 25 bliadhna, thuirt HIE gum bi an rèile agus oighreachd a' Chàirn Ghuirm a' fuireach anns an roinn phoblaich.