Coinneamh CnES ann an Uibhist

Comhairle nan Eilean Siar
Image caption Beachdaichidh buill air gearraidhean suas ri £11m.

Coinnichidh buill de Chomhairle nan Eilean Siar ann an Uibhist Diciadain airson a' chiad turas ann an dusan bliadhna.

Tha a' Chomhairle ag ràdh gur ann airson cothrom a thoirt do mhuinntir Uibhist fhaicinn mar a tha an t-ùghdarras ag obrachadh.

Bidh buill a' beachdachadh air a' bhuidseat aca airson nan trì bliadhnaichean-ionmhais a tha ri thighinn, am measg eile.

Tha Comhairlichean ag ràdh gum faodadh gum feum iad gearraidhean a dhèanamh suas ri £11m san ùine sin.

Gearraidhean

Thèid iarraidh air Comhairlichean buidseat fa leth aontachadh airson na bliadhna-ionmhais 2015/16 leis gu bheil iad fhathast a' feitheamh fios mu mar a roinneas COSLA a-mach airgead am measg nan comhairlean.

Thèid an uair sin iarraidh air buill beachdachadh air mar a dh'fheumas iad gearraidhean a dhèanamh thairis air na trì bliadhnaichean air fad.

Thèid iarraidh air Àrd-Oifigear na Comhairle, agus Stiùiriche an Ionmhais, aithisg a thilleadh dhan ath-shreath de choinneamhan san Ògmhios mu na seòrsa ghearraidhean a dh'fheumas iad a dhèanamh.

Bidh an aithisg sin a' toirt sùil gheur air gearraidhean ann an seirbheisean, àireamhan luchd-obrach agus buidseatan anns an fharsainneachd.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile