Deasbad dleastanas an luchd-measaidh
- Air fhoillseachadh
Thèid faighneachd do luchd-measaidh nan croitearan dè na dleastanasan a bu chòir a bhith orra.
Tha timcheall air 90 dhuibh ann an-dràsta air feadh nan sgìrean croitearachd is iad a' dèanamh ceangail eadar Coimisean na Croitearachd agus na croitearan fhèin.
Am measg nan dleastanasan a th' orra an-dràsta, tha a bhith a' cur fios air a' Choimisean ann an suidheachadh sam bith a tha iad a' faicinn iomchaidh a thaobh leithid iarrtas 'son chroitean no mar a tha fearann air a chleachdadh.
A rèir a' Coimisein ge-tà, chan eil dleastanas an luchd-measaidh soilleir gu leòr aig an ìre seo.
Tha an t-ùghdarras a' cumail a-mach gu bheil a' mhì-chinnt a' fàgail gu bheil luchd-measaidh ann an diofar àiteachan a' dèanamh diofar rudan.
Soillearachadh
Feumaidh an suidheachadh a shoillearachadh, a rèir tè-gairm a' Choimisein, Susan Walker.
"Tha an luchd-measgaidh gu math diofraichte is chan eil iad a' faighinn pàigheadh," thuirt a' Bhean-Phòsta Walker.
"Tha cuid dhiubh gu math deònach a bhith a' sgrìobhadh aithisgean airson nan iarrtasan a tha a' tighinn a-staigh agus cuid eile, chan eil iad ag iarraidh an obair sin a dhèanamh.
"Feumaidh sinn còmhradh a bhith againn mu dheidhinn dè tha iadsan comhfhurtail a bhith a' dèanamh airson a' Choimisein agus airson croitearachd a bhrosnachadh anns na sgìrean aca fhèin," thuirt i.
Tha an Coimisean an dòchas co-labhairt a chur air dòigh deireadh na bliadhna gus an gnothach a dheasbad.