Stiùidio
Cha chluich seo air an uidheamachd agaibh

Naidheachdan 11:00m

28 An Cèitean 2014 Ùraichte aig Ùraichte aig

Neo-eisimeileachd

Tha muinntir na h-Alba a' faighinn gach taobh an-diugh den deasbad mu neo-eisimeileachd. Tha Riaghaltas na h-Alba ag ràdh gun cuireadh neo-eisimeileachd £5bn ris an eaconamaidh. Tha Riaghaltas na Rìoghachd Aonaichte a' cumail a-mach gum biodh sluagh na h-Alba nas miosa dheth eadar sluagh a' sìor-fhàs nas sine, agus crìonadh ann an toradh ola a' Chuain a Tuath.

Taighean-dealbh

Thuirt buidheann nan taighean-dealbh, Vue, gun sguir iad a shealltainn shanasan co-cheangailte ris an deasbad mu neo-eisimeileachd, an dèidh ghearainnean bhon mhòr-shluagh. Thuirt Vue gun sguir iad a shealltainn shanasan airson agus an aghaidh neo-eisimeileachd nuair a thig an iomairt a th' ann an-dràsta gu ceann air a' chòigeamh là den ath-mhìos. Tha e coltach gu bheil companaidhean eile a' dèanamh an dearbh rud anns na taighean-dealbh aca fhèin.

An t-Aonadh Eòrpach

Thuirt Ceann-Suidhe na Frainge, Francois Hollande, gum feum an t-Aonadh Eòrpach a bhith nas èifeachdaiche, agus a bhith a' gabhail nas lugha gnothaich ri cùisean nan dùthchannan aig a bheil ballrachd anns an Aonadh. Thàinig a bheachd-san an dèidh coinneimh anns a' Bhruiseil an-raoir, aig an tuirt Prìomhaire Bhreatainn, Dàibhidh Camshron, gu bheil an AE air fàs ro mhòr, agus ro àrdanach.

Trèana Oidhche

Ghlèidh a' bhuidheann Serco cùmhnant fad 15 bliadhna airson seirbheisean trèana na h-oidhche eadar Lunnainn agus Alba. Gheall Serco gun toir iad leasachadh gu math sgiobalta air na seirbheisean air an gabh iad smachd an ath-bhliadhna. 'S e FirstGroup, a tha stèidhichte ann an Obar Dheathain a tha a' ruith na seirbheis an-dràsta.

RET

Tha Comhairle nan Eilean Siar am measg na chuir fàilte air leudachadh faraidhean RET gu aiseagan a' chosta an iar gu lèir bhon Damhair an ath-bhliadhna. Ach tha a' Chomhairle agus comhairlichean ann an sgìrean eile cuideachd a' faighneachd carson nach deach sin a dhèanamh an-dràsta no nas tràithe na seo.

Ionadan-stiùiridh nam Poileas

Thòisich Poilis na h-Alba an-diugh a' dùnadh ionadan-stiùiridh air feadh na dùthcha. Dhùin ionad Dhùn Phris nuair a chrìochnaich an siofta mu dheireadh aig 07:00m. Dùinidh trì eile fhathast, agus an dèidh sin bidh na seirbheisean stèidhichte aig còig ionadan-fòna eadar Glaschu, Dùn Èideann, Tobar na Màthar, Dùn Dè agus Inbhir Nis.