Pìoban uisge ùra dhan Rubha

Image copyright Getty Images
Image caption Tha gearainean air a bhith air feadh na sgìre bho chionn bhliadhnaichean nach robh am uisge a' sruthadh mar bu chòir.

Tha Uisge na h-Alba air tòiseachadh a' deasachadh airson pìoban uisge ùr a chur dhan Rubha ann an Leòdhas.

Tha mòran ghearainean air a thighinn às an sgìre bho chionn grunn bhliadhnaichean, nach eil sruth làidir gu leòr a' tighinn tro na pìoban.

Thèid pìoban nas motha a chur an sàs agus tha Uisge na h-Alba ag ràdh gun geàrr seo sìos air cho tric 's a bhios an t-uisge dheth.

Tha Uisge na h-Alba air cùmhnant a thoirt do chompanaidh MhicAmhlaigh à Aisgeirnis airson còrr is 2,000 meatair de phìob ur a chur sìos am Bràighe, a' dèanamh ceangal às ùr eadar an Rubha agus siostam uisge Eilean Leòdhais.

Cosgaidh am pròiseact £180,000 agus tha dùil gun tòisich an obair ann an cola-deug.

Pìoban nas motha

Thèid pìob deich òirlich a chur an sàs an àite an t-seann phìob ochd òirlich a th' ann an-dràsta, a chaidh a chur an sàs bho chionn 60 bliadhna, agus leigidh seo do bharrachd uisge sruthadh troimhpe.

Tha Uisge na h-Alba ag ràdh gum bi seo a' ciallachadh nach bi pìoban ag aoidion cho tric, agus nach bi daoine às aonais uisge.

Tha gearainean air a bhith air feadh na sgìre bho chionn bhliadhnaichean nach robh am uisge a' sruthadh mar bu chòir, agus gun robh amannan ann far nach obraicheadh frasan is innealan-nighe.

Chan eil fhios fhathast cuin a thèid pìoban ùra a chur bho phìob mhòr na sgìre dha na bailtean fa leth.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile