Cead do thuath-gaoithe

Bidh 67 crann san leasachadh aig Sròn na Luirge

Chaidh cead a thoirt seachad airson tuath-gaoithe connspaideach a thogail faisg air Cille Chuimein.

Cruthaichidh tuath-gaoithe Sròn na Luirge, anns am bi 67 crann, cumhachd gu leòr airson dealan a chumail ri 114,000 dachaigh.

Bha an luchd-leasachaidh, SSE, am beachd an toiseach 83 crann-gaoithe a thogail os cionn Cille Chuimein - faisg air sgeama hydro Ghleann Dotha - ach dh'aontaich iad an-uiridh meud an sgeama a ghearradh gus nach toireadh e uiread de bhuaidh air an àrainneachd.

Dh'ainmich Ministear a' Chumachd, Fearghas Ewing, gu bheil an Riaghaltas air cead a thoirt dhan phlana.

Luach

Tha an Riaghaltas ag radh gum bi luach £30m anns an sgeama thairis air 25 bliadhna agus gum faigh a' choimhearsnachd an dàrna leth den airgead sin.

Thuirt Mgr Ewing gun cuidich an sgeama a thaobh targaidean an Riaghaltas air cumhachd ath-nuadhachail.

Thuirt Urras Iain Muir ge-tà, gur ann a mhilleas an tuath-gaoithe àrainneachd a tha gu math prìseal.

Chuir a' bhuidheann Sreap Alba an aghaidh an leasachaidh cuideachd.