Cead-dealbhachaidh do loidhne-rèile Srath Pheofhair

Seann stèisean Srath Pheofhair Image copyright Undiscovered Scotland
Image caption Tha Comann Rèile-Smùide Shrath Pheofhair ag amas air einnsean-smùide a ruith air loidhne-rèile ùr faisg air an t-seann stèisean.

Chuir tè de chomhairlichean sgìre Strath Pheofair fàilte air an naidheachd gun deach cead-dealbhachaidh a thoirt don phròiseict airson seann loidhne-rèile a' bhaile fhosgladh às ùr.

Tha a' bhuidheann a th' air a chùlaibh, Comann Rèile-Smùide Shrath Pheofhair, a-nis am beachd an talamh a cheannach.

Uile gu lèir, tha dùil gun cosg a' phròiseict còrr is £2m agus, a rèir a' chomhairliche, Audrey Nic na Ceàrdaich, bidh buannachdan mòra na chois.

Tha a' Chomh. dòchasach gun tarraing an loidhne-rèile luchd-turais don sgìre, rud a bhiodh na bhuannachd do dh'iomadh gnìomhachas, leithid àiteachan-bidhe, taighean-tasgaidh agus seann togalaichean na sgìre.

Thuirt i gum faodadh trèana-smùid, coltach ri trèana a' Chaoil, mòran dhaoine a thàladh dhan sgìre.

Stèisean

Tha còrr is 60 bliadhna bho thadhail an t-einnsean mu dheireadh air seann stèisean a' bhaile.

Tha Comann Rèile-Smùide Shrath Pheofhair ag amas air einnsean-smùide a ruith air loidhne-rèile ùr faisg air an t-seann stèisean.

Dhùin Stèisean Shrath Pheofhair do thrèanaichean sa bhliadhna 1952 agus a-nis tha bùithtean anns an t-seann togalach.

Chaidh an stèisean a thogail anns an 19mh Linn, nuair a bha Srath Pheofhair fhathast trang le daoine a' tighinn bho gach ceàrn gus na h-uisgeachan ainmeil aig an spà a ghabhail.

Ach, nuair a dh'atharraich fasanan dhaoine, chaidh an stèisean a dhùnadh.

Comann Rèile-Smùide Shrath Pheofhair

Tha Comann Rèile-Smùide Shrath Pheofhair a-nis ag amas air pàirt den t-seann loidhne-rèile fhosgladh a-rithist agus einnsean-smùide a ruith air.

'S e an t-amas aca trèana a ruith mar iomairt dualchais airson luchd-turais agus muinntir a' bhaile.

Chan eil rathad-iarrainn ann an-diugh; tha craobhan air fàs thairis air agus tha feum air obair mhòr mus ruith trèana oirre a-rithist.

Thuirt Ms Nic na Ceàrdaich gum biodh a' phròiseict cosgail, leis gu bheil trèanaichean is rèilichean is eile a dhìth, ach tha dòchas ann gun toir e daoine bho air feadh an t-saoghail dhan sgìre.

A-nis, leis gun do shoirbhich leis a' chead-dealbhachaidh, thuirt Ms Nic na Ceàrdaich gun tòisichear air airgead a thogail.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile