Stiùidio
Cha chluich seo air an uidheamachd agaibh

Naidheachdan 11:00m

19 An t-Ogmhìos 2014 Ùraichte aig Ùraichte aig

Iorac

Tha Na Stàitean Aonaichte fhathast a' coimhead air atharrachadh poileataigeach ann an Iorac, mar dhòigh air dèiligeadh ris an ar-a-mach Sunni, mus beachdaidh iad air armachd a chur an sàs. Tha an Leas Cheann-suidhe Aimearaganach, Joe Biden, air a bhith a' bruidhinn ri Prìomh Mhinistear Iorac, Nouri al-Maliki, agus ri ceannard nan Sunni. Tha e coltach gu bheil Aimearaga den bheachd nach bi sìth ann eadar Sunni agus Shia gus am fàg am Prìomh Mhinistear, Nouri al-Maliki, a dhreuchd.

Referendum

Dh'fhoillsich Roinn an Ionmhais ath-chunntas air na buannachdan do dh'Alba ann a bhith a' fuireach anns an Aonadh. Tha am pàipear ag ràdh gu bheil Alba a' faighinn cothrom air cìsean nas lugha agus seirbheisean poblach nach biodh ann le neo-eisimeileachd. Agus tha am pàipear a' cumail a-mach gun dèanadh seann aois an t-sluaigh agus nas lugha teachd-a-steach bho ola a' Chuan a Tuath tuilleadh cosgais a bharrachd air an sin. Thuirt Rùnaire Ionmhais na h-Alba, Iain Swinney, nach eil guth aig Westminster ach air Lunnainn agus ceann an ear-dheas Shasainn, agus gur ann a shoirbhicheadh Alba leis na cothroman a thigeadh le neo-eisimeileachd.

Àiteachas

Agus bidh deasbad air dè a' bhuaidh a bheireadh neo-eisimeileachd air àiteachas an Alba am measg na bhios a' dol air adhart aig Fèill Àiteachais Rìoghail na Gàidhealtachd a tha a' tòiseachadh ann an Ingliston, faisg air Dùn Èideann, an-diugh.

Làbaraich

Chuireadh am Pàrtaidh Làbarach stad air sochairean sòisealta do dhaoine òga a tha gun chosnadh agus gun sgilean obrach, mura h-aontaich iad ri trèanadh. Tha na Làbaraich a' moladh cuir às do 'jobseekers allowance' do 100,000 òigridh eadar 18 agus 21 bliadhna de dh'aois, agus a' cur sochair na àite a bhiodh stèidhichte air teachd-a-steach am pàrantan agus air trèanadh airson obair. Thuirt an Seansalair, Seòras Osborne, gun cuireadh plana nan Làbarach an eaconamaidh air an t-slighe cheàrr a-rithist.

Loch Baghasdail

Thuirt fear de chomhairlichean Uibhist gum feum strì airson factaraidh feamainn ann an Loch Baghasdail an dèidh dhan chompanaidh Marine Biopolymers innse nach tèid iadsan air adhart leis an sgeama, a chruthaicheadh suas ri 60 cosnadh, mar phàirt de leasachadh air cala Loch Baghasdail. Thuirt Raghnall MacFhionghain gum feum cuideam a chuir air Marine Biopolymers a dhol air adhart leis, air neo gum feum buidheann eile fhaighinn a bheir am pròiseact gu buil.

MacGilleMhìcheil

Thèid inbhe shònraichte UNESCO a bhuileachadh a-nochd air cruinneachadh de chultar is eachdraidh Gàidhealach MhicGilleMhìcheil MhicBhatair. Tha e am measg naoi tasglainn de stuth air an tèid inbhe, mar chomharra air cho cudromach 's a tha iad do dhualchas na cruinne.