Barrachd feum air bancaichean-bìdh

Banca-bìdh Image copyright PA
Image caption Dh'fhosgail Blythswood seachd bancaichean-bìdh air Ghàidhealtachd agus chuidich iad 4,500 duine anns a' bhliadhna a chaidh seachad.

Thuirt a' bhuidheann charthannais Blythswood gu bheil iad air mìle duine a bharrachd fhaicinn aig na bancaichean-bìdh aca am-bliadhna, an taca ris a' bhliadhna ron a sin.

Dh'fhosgail iad seachd bancaichean-bìdh air a' Ghàidhealtachd agus chuidich iad 4,500 duine anns a' bhliadhna a chaidh seachad.

Thàinig an naidheachd agus Riaghaltas na h-Alba air àireamhan fhoillseachadh a' sealltainn àrdachadh mòr san àireamh de dh'Albannaich a bha a' tighinn beò ann am bochdainn an-uiridh.

Thuirt Mùrchadh MacAoidh, a tha ag obair aig Blythswood ann am Baile Eòghain, gu bheil grunn adhbharan airson seo.

Dh'innis e gur e 'dàil ann an sochairean' am prìomh adhbhar gu bheil biadh ga thoirt seachad, le 'teachd-a-steach ìosail' agus 'atharraichean ann an sochairean' cuideachd a' cur ris na h-àireamhan.

Ged nach eil fhios ciamar a bhios cùisean san àm ri teachd, thuirt Mgr MacAoidh gu bheilear glè thaingeil airson a' bhìdh a thathas a' faighinn bho sgoiltean, eaglaisean agus bùithtean na sgìre.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile