Stiùidio
Cha chluich seo air an uidheamachd agaibh

Naidheachdan 11:00m

25 An t-Iuchar 2014 Ùraichte aig Ùraichte aig

Eaconamaidh

Tha eaconamaidh Bhreatainn nas fheàrr na bha i mus do thòisich an crìonadh ann an 2008. Tha Oifis nan Staitistig Nàiseanta ag ràdh gun robh fàs 0.8% anns an dàrna cairteal den bhliadhna. Thuirt an Seansalair, Seòras Osborne, gur e dearbhadh a th' ann air plana eaconomaigeach an Riaghaltais. Ach tha na Làbaraich a' gearain nach eil sin na bhuannachd fhathast do mhòran a tha a' faicinn luach an tuarastail a' sìor thuiteam.

RBS

Thàinig àrdachadh mòr air prothaid Bhanca Rìoghail na h-Alba, ro chìsean. Rinn a' bhuidheann £2.6bn air a' chiad leth den bhliadhna seo, a dhà uimhir ris an aon ùine an-uiridh. Buinidh 80% den bhanca do luchd-pàighidh na cìse. Thuirt RBS gur e ath-bheothachadh na h-eaconamaidh as motha as coireach gu bheil na figearan nas fheàrr na bha duil.

Geamaichean a' Cho-Fhlaitheis

Tha dùil ri còrr is 100,000 duine an-diugh, eadar na diofar fharpaisean, air an dàrna là de Gheamaichean a' Cho-Fhlaitheis ann an Glaschu. Am measg nam farpaisean an-diugh, tha snàmh, judo agus rothaireachd.

Mikaeel Kular

Dh'aidich màthair, anns an Àrd-Chùirt ann an Dùn Èideann, gun do mharbh i a gille beag, a bha trì bliadhna de dh'aois, ann an Dùn Èideann anns an Fhaoilleach. Bha Rosdeep Adekoya, a tha 34 bliadhna de dh'aois, fo chasaid gun do mhurt i Mikaeel Kular, ach ghabh an Crùn ris a' chasaid a bu lugha.

Algeria

Thuirt Riaghaltas na Frainge gur e droch shìde as coltaiche a bu choireach ri tubaist le plèan às Algeria an-dè. Chaidh sprùilleach a' phlèan, air an robh còrr is 100 duine, fhaighinn ann am Fàsach an Sahara ann am Mali. Thuirt Ceann-Suidhe na Frainge, Francois Hollande, gun d' fhuair saighdearan Frangach aon de na bogsaichean clàraidh.

Deuchainnean

Tha mòran sgoiltean air feadh Alba a' cur maill air na deuchainnean ùra aig Àrd-Ìre ann an cuid de chuspairean. Bu chòir dhan t-siostam ùr Higher tòiseachadh am-bliadhna, ach tha rannsachadh BBC ag ràdh gu bheil mòran sgoiltean a' cur dàil air chun ath-bhliadhna. Thuirt Riaghaltas na h-Alba an-uiridh gun robh làn chead aig sgoiltean sin a dhèanamh nam biodh e gu math na cloinne.

Seirbheis dhotair

Tha Eilean Mhuile a-niste am measg nan sgìrean dùthchail anns nach eil dotair a nì obair èiginn air taobh a-muigh nan uairean àbhaisteach. Thuirt dotairean ann an Tobar Mhoire nach dèan iad an obair sin tuilleadh. Tha na h-uimhir de sgìrean eile air a' Ghàidhealtachd às aonais dhotair a nì frithealadh orra air an oidhche, agus air an deireadh sheachdain.