Pàipearan an luchd-bhòtaidh puist gan sgaoileadh

Pàipear-bhòtaidh Image copyright PA
Image caption Chan eil ach seachdain air fhàgail aig daoine gus clàradh airson bhòt fhaighinn san referendum air an 18mh là den t-Sultain.

Tòisichidh comhairlean na h-Alba air pàipearan-bhòtaidh an referendum air neo-eisimeileachd do dh'Alba a chur air falbh Dimàirt do dhaoine a roghnaich bhòtadh tron phost.

Chan eil ach seachdain air fhàgail aig daoine gus clàradh airson bhòt fhaighinn san referendum air an 18mh là den t-Sultain.

Gheibh an fheadhainn a roghnaich bhòtadh tron phost an cuid phàipearan bho Dhiardaoin a-mach.

Chaidh còrr is 50,000 bileag-chlàraidh a thoirt a-nuas bho làrach-lìn Choimisean an Taghaidh eadar an 11mh agus an 20mh là den Lùnastal.

Thairis air an àm sin, chaidh mu 2.5m lethbhreac de stiùireadh bhòtaidh neo-thaobhach a' Choimisein cuideachd a sgaoileadh.

Leanaidh iomairtean telebhisein, rèidio, sanasachd agus air-loidhne na buidhne gus an tig an ceann-ama airson clàradh air an 2na là den t-Sultain.

Thuirt Anndra O'Neill bho Choimisean an Taghaidh: "Tha ùidh mhòr aig daoine anns an referendum agus tha sin follaiseach leis an dòigh anns an do ghabh daoine ri ar n-iomairt sanasachd taobh a-staigh a' chiad 10 là.

"Le dìreach seachdain air fhàgail gus clàradh airson bhòtadh, tha sinn a' cur ìmpidh air duine sam bith nach eil clàraichte gu ruige seo bileag a thoirt a-nuas aig www.aboutmyvote.co.uk, no fònadh thugainn cho luath 's a ghabhas air 0800 3 280 280.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile