Triùir far an dreuchd am Malaig

Chan eil dùil gum fosgail Ionad Mhic an Tòisich às ùr airson beagan sheachdainean.

Dhearbh Bòrd Slàinte na Gàidhealtachd gun deach triùir luchd-obrach aig dachaigh chùraim do sheann daoine ann am Malaig a chur far an dreuchd rè ùine ri linn chasaidean de "dhroch chleachdaidhean" aig an ionad.

B' fheudar do NHS na Gàidhealtachd Ionad Mhic an Tòisich a dhùnadh air a' mhìos seo chaidh, nuair a nochd na casaidean.

Chaidh an seachdnar sheann daoine a bha a' fuireach ann a ghluasad dhan Ghearasdan às dèidh dhan Bhòrd Shlàinte gearainean fhaighinn mu mar a bhathas a' dèiligeadh riutha.

Rannsachadh

Chuir an t-ùghdarras triùir luchd-obrach far an dreuchd rè ùine fhad 's a tha rannsachadh aca a' dol.

Thuirt tè-labhairt bhon Bhòrd Shlàinte gu bheil trèanadh a dhìth, agus gum faigh an luchd-obrach uile sin.

Dhearbh i nach fosgail an dachaigh chùraim airson sia seachdainean eile.

Thuirt i cuideachd gu bheil sgrùdadh poilis mun ghnothach a' leantainn.