Salmond a' toirt slaic air "Sgioba Westminster"

Ailig Salmond, Jim Sillars agus Nicola Sturgeon
Image caption Bha Jim Sillars agus Nicola Sturgeon cuide ris a' Phrìomh Mhistear aig tachartas Bu Chòir ann an Dùn Èideann.

Tha am Prìomh Mhinistear, Ailig Salmond, air na h-oidhirpean aig Daibhidh Camshron, Ed Miliband agus Nick Clegg gus Alba a ghleidheadh san RA a chaitheamh a-mach.

A' bruidhinn aig tachartas Bu Chòir ann an Dùn Èideann, thuirt Mgr Salmond gur ann a bha an triùir cheannardan coltach ri "Sgioba Westminster".

Mhol e cuideachd gum bu chòir uallach a bhith orra mu an cuid obraichean.

Thàinig seo agus Mgr Camshron, Mgr Miliband agus Mgr Clegg air siubhal a dh'Alba air thoiseach air referendum na h-ath-sheachdain.

Tha cunntasan-bheachd air sealltainn o chionn ghoirid gu bheil iomairt an referendum air fàs air leth teann.

'Sgioba na h-Alba an aghaidh Sgioba Westminster'

Thuirt Mgr Salmond: "An-diugh, 's e a th' againn ach eisimpleir de Sgioba na h-Alba an aghaidh Sgioba Westminster.

"Tha farsaingeachd agus ruigsinneachd na h-iomairt Bu Chòir follaiseach dhan a h-uile duine - chan ann mu Phàrtaidh Nàiseanta na h-Alba, am Pàrtaidh Uaine no pàrtaidhean poileataigeach a tha seo. Tha e a' dol tro chomann-shòisealta na h-Alba air fad.

"'S e a tha sinn a' faicinn an-diugh bho thaobh eile an deasbaid, Sgioba Westminster a' sgèith suas a dh'Alba airson là air sgàth 's gu bheilear a' clisgeadh san iomairt.

Image copyright Getty Images
Image caption Tha pàrtaidhean an Aonaidh air sùil às ùr a thoirt air an cuid phlanaichean gus barrachd chumhachdan a thoirt do Holyrood, ma thèid bhòtadh an aghaidh neo-eisimeileachd.

"Tha sinne airson 's gum bi pàrlamaid làidir againn a tha comasach air obraichean a chruthachadh do dh'Alba. Tha coltas gur ann air na h-obraichean aca fhèin a tha aire Sgioba Westminster."

Ach thuirt Mgr Salmond a-rithist nach robh iomairt "Bu Chòir Alba" ag iarraidh ro-bheachdan sam bith a dhèanamh, le beagan is seachdain ri dhol ron a' bhòt air an 18mh là den t-Sultain.

Thuirt am Prìomh Mhinistear: "Thairis air na mìosan mu dheireadh, agus gu dearbha sna seachdainean a dh'fhalbh, tha sinn air a bhith a' conaltradh ri ar co-luchd-dùthcha.

Gluasad

"Chan eil sinn a' dèanamh ro-bheachdan mu bhòt na h-ath-sheachdain ach, a dh'aindeoin sin, tha mi a' smaoineachadh gu bheil an fhianais a' sealltainn gu bheil barrachd is barrachd de ar co-luchd-dùthcha a' fàs nas cinntiche às na h-argamaidean aig "Bu Chòir". Gun teagamh 's ann a dh'ionnsaigh "Bu Chòir" a tha an gluasad.

Le barrachd taic, a rèir coltais, ga toirt don iomairt airson neo-eisimileachd, tha pàrtaidhean an Aonaidh air sùil às ùr a thoirt air an cuid phlanaichean gus barrachd chumhachdan a thoirt do Holyrood, ma thèid bhòtadh an aghaidh neo-eisimeileachd.

Thuirt Alasdair Darling, a tha os cionn na h-iomairt Nas Fheàrr Còmhla, gun robh na nàiseantaich "mì-mhodhail" agus "gràineil" a' toirt "Sgioba na h-Alba" orra fhèin agus "Sgioba Westminster" air an luchd-dùbhlain.

"Tha fios againn cò air a bheil e a-mach an seo - nach eil còir aig daoine nach eil air an taobh aigesan èisteachd fhaiginn, nach eil iad dha-rìribh tìr-ghràdhach, dha-rìribh Albannach.

"Tha e gu tur mì-mhodhail do mhòran dhaoine ann an Alba, tha e gu tur gràineil agus chan eil adhbhar sam bith air a shon."

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile