Ionad Acres ga fhosgladh gu h-oifigeil

Gabhaidh an t-ionad suas ri ochd duine fichead

Chaidh ionad ùr Acres ann an Steòrnabhagh, airson daoine gun dachaigh, fhosgladh gu h-oifigeil Diluain.

Tha 24 seòmar anns an ionad, a tha suidhichte ri taobh seann raon-chluiche Acres air Rathad an Eilein, agus gabhaidh e suas ri 28 duine.

Tha an togalach ga roinn ann an ceithir flataichean, le cidsin anns gach flat, agus tha goireasan nigheadaireachd agus seòmar airson chur-seachadan ann dhan luchd-còmhnaidh gu lèir.

Bidh daoine a' fuireach ann an ionad ùr fhad 's a tha iad a' feitheamh air àite-fuirich nas maireannaiche.

Goireasach

Thuirt Fear-gairm Comhairle nan Eilean Siar, Tormod Dòmhnallach, gu bheil an t-àite gu math nas goireasaiche gu h-àraidh do theaghlaichean, seach a bhith a' fuireach ann an taighean leabaidh 's bracaist mar a bha a' tachairt thuige seo.

Chaidh an togalach a dhealbh ann an dòigh a tha bàidheil dhan àrainneachd le teasachadh fon làr agus cumhachd na grèine ga chur gu feum.

Chaidh an t-ionad fhosgladh gu h-oifigeil le Ceannard na Comhairle, Aonghas Caimbeul.