Stiùidio
Cha chluich seo air an uidheamachd agaibh

Naidheachdan 11:00m

21 An Dàmhair 2014 Ùraichte aig Ùraichte aig

Oscar Pistorius

Chaidh binn còig bliadhna sa phrìosan air an lùth-chleasaiche à Afraga a Deas, Oscar Pistorius, a mharbh a leannan Reeva Steenkamp anns a' Ghearran an-uiridh nuair a loisg e oirre le gunna. Chaidh Pistorius a shaoradh air a' mhìos a chaidh bho chasaid muirt. Tha lagh Afraga a Deas a' ciallachadh gum faod, an dèidh deich mìosan, e saorsa iarraidh.

Hurricane Gonzalo

Tha dùil gum mair gaoth làidir a' mhòr-chuid den là an-diugh fhad 's a tha na th' air fhàgail de Hurricane Gonzalo a' gluasad thar na dùthcha. Dh'iarr Ministear Còmhdhail na h-Alba, Keith Brown, air luchd-siubhail ùine gu leòr fhàgail airson an turais. Tha Drochaid an Eilein Sgitheanaich dùint gu lèir dhan a h-uile carbad, 's tha casg air carbadan àrda air drochaidean Fhoirthe, Earsgain agus Dhòrnaich. Tha mòran de na seirbheisean aiseig nan tàmh an-diugh cuideachd.

Dave Lee Travis

Cho-dhùin Àrd-Fhear-Lagha na dùthcha nach tèid binn prìosain a chaidh fhàgail a' crochadh os cionn Dave Lee Travis, gu breithneachadh aig Cùirt an Ath-Thagraidh. Thuirt Jeremy Wright QC gu bheil esan den bheachd nach eil am binn sin idir ro lag. Chaidh Travis, a bha na chraoladair rèidio, fhaighinn ciontach air a' mhìos a chaidh gun do rinn e ionnsaigh mhì-choltach.

Ebola

Tha mu cheud saighdear Breatannach air an t-slighe a Sierra Leone an-diugh mar phàirt de thaic na Rìoghachd Aonaichte dhan t-strì an aghaidh a' ghalair Ebola air taobh siar Afraga. Tha an Rùnaire airson Leasachaidh Eadar-nàiseanta, Justine Greening, a' siubhal còmhla ris na saighdearan bhon Bhuidhinn Mheidigich Rìoghail.

Prìs an Dealain

Tha Comhairle nan Eilean Siar a' cur an taic ris an iomairt an aghaidh na cosgais a bharrachd de 2sg gach aonad dealain a tha a' dol air luchd-cleachdaidh SSE air a' Ghàidhealtachd agus anns na h-Eileanan. Tha an t-ùghdarras am measg na tha a' faighneachd de dh'SSE carson a tha cosgais a bharrachd air muinntir a' chinn a tuath na th' ann an sgìrean eile.

Bàt'-aiseig

Tha cathraiche Comhairle Coimhearsnachd Shlèite ag ràdh gum bu chòir bàt'-aiseig ùr a chur air an t-seirbheis eadar Malaig is Armadal. Dh'innis Caledonian Mac a' Bhriuthainn gum bi leudachadh air an t-seirbheis air mìosan a' Gheamhraidh le seirbheis a bharrachd air an oidhche airson cola-deug aig toiseach agus deireadh an t-seusain. Tha Ruairidh Moireach ag ràdh gu bheil cho trang 's a tha an t-seirbheis air an t-Samhradh cuideachd na dhearbhadh gu bheil feum air bàta ùr.