SSE ag iarraidh 'prìs choitchinn'

Image copyright Thinkstock

Image caption Tha a' chompanaidh dealain SSE ag ràdh gu bheil iad air a bhith ag iomairt fad mhìosan airson aon phrìs dealain dhan dùthaich air fad.

Tha a' chompanaidh dealain SSE ag ràdh gu bheil iad air a bhith ag iomairt fad mhìosan airson aon phrìs dealain dhan dùthaich air fad.

Tha seo a' tighinn às dèidh ghearainean thairis air a' chola-deug a dh'fhalbh mu mar a tha SSE a' toirt air muinntir na Gàidhealtachd 's nan Eilean dà sgillinn a bharrachd a phàigheadh airson gach aonad dealain, an coimeas ri àiteachan eile san dùthaich.

Tha gearanan air nochdadh anns na meadhanan agus bho ùghdarrasan ionadail - nam measg, bha Comhairle nan Eilean Siar, a thuirt gun robh a' chùis maslach.

Aig an àm, thuirt a' chompanaidh gur e an fheadhainn a bha a' stiùireadh an lìonra dealain as coireach, a dh'aindeoin 's gur e roinn eile de SSE a tha sin.

Ach a-nis, tha iad air sgrìobhadh gu Rùnaire a' Chumhachd, Ed Davey, ag iarraidh prìs choitchinn air feadh Bhreatainn, 's ag ràdh gu bheil iad air a bhith ag iomairt airson an leithid o chionn mhìosan.